بۆمبەیەکا چاندی ب کاروانەکێ ھێزێن پێشمەرگە دا تەقیا

بۆمبەیەکا چاندی ب کاروانەکێ ھێزێن پێشمەرگە دا تەقیا

 ئیرۆ ل ناڤچەیا داوودە یا گەرمیانێ بۆمبەیەکا چاندی ب کاروانەکێ ھێزێن پێشمەرگە دا تەقیا و چ زیانەکا جانی چێنەبوو.

رێڤەبەرێ ناحیەیا زینانە ل ناڤچەیا داوودە یا سەر ب قەزا کفری وەھاب ئەحمەد راگەھاند: “ئیرۆ 7/11/2021ێ ل سینۆرێ گوندێ بەلەگەیا ناڤچەیا داوودە بۆمبەیەکا چاندی ب ترۆمبێلەکا فەوجا دو یا لیوایا 144 یا ھێزێن پێشمەرگە دا تەقیا، لێ دەرڤەیی زیانێن مادی، چ زیانەکا جانی ل دوو خوە نەئانی.”

ھەروەھا گۆت: “ل ھەمان جیھ، بۆمبەیەکا دی یا چاندی ھاتیە دانان و نھا تیمەکا تایبەت مژوولێ پووچکرنا وێ بۆمبەیێ نە.”

ناڤچەیا داوودە ژ 50 گوندێن کوردان پێک دهێت، د ئەساس دا سەر ب باژارێ خورماتوویە، لێ د راپەرینا سالا 1991ێ دا ژ دەست رەژیما بەعسا ئیراقێ ھات رزگار کرن و ژ وێ دەمێ ھەتا نھا ناڤچە ژ ئالیێ ئیداری ڤە سەر ب قەزا کفری یە.

پشتی خیانەتا 16ێ جۆتمەھا 2017ێ دەما کو میلیشیایێن حەشدا شەعبی خورماتوو داگیر کری، بەشەک ژ تەرۆریستێن داعشێ بەرێ خوە دان چەند گوندەکێن ناڤچەیا داوودە و ئەو گوندێن کەتنە ناڤچەیا ڤالاتیا ئەولەھی یا د ناڤبەرا پێشمەرگە و ھێزێن ئیراقێ و ژ وێ دەمێ ڤە تەرۆریست دەم ب دەم کریارێن تەرۆریستی ل دژی خەلکێ و ھێزێن ئەولەھیێ ئەنجام ددەن.