ھێزێن پێشمەرگە و ئارتێشا ئیراقێ ئۆپەراسیۆنەکا ھەڤبەش ل دژی داعشێ ئەنجامدا

ھێزێن پێشمەرگە و ئارتێشا ئیراقێ ئۆپەراسیۆنەکا ھەڤبەش ل دژی داعشێ ئەنجامدا

 وەزارەتا پێشمەرگە راگھاند، ل سەر داخوازا وەزارەتا بەرەڤانیێ یا ئیراقێ، ئۆپەراسیۆنەکا ھەڤبەش ب کووراھیا 5 کیلۆمەترۆیان ل میحوەرێ 6ێ سەنگەرێن پێشمەرگە ھاتە کرن. د ئۆپەراسیۆنێ دا، چەندین تونێلێن چەکدارێن داعشێ ھاتن ژناڤبرن. کۆمیتەیا پێشمەرگە ژی دبێژیت، ئەڤ ئۆپەراسیۆنا ھەڤبەش گەلەکا گرینگە، لێ دڤێت ڤالاھیێن ئەولەھیێ بهێن داگرتن.

پشتی بوویەرێن 16ێ جۆتمەھا 2017ێ، ژ بۆ جارا یەکەمە ھێزێن پێشمەرگە و ئارتێشا ئیراقێ ئۆپەراسیۆنەکا ھەڤبەش ل سینۆرێ پارێزگەھا نەینەوایێ ئەنجام ددەن. ئۆپەراسیۆن ل میحوەرێ 6 یێ ھێزێن پێشمەرگە و ژ بۆ رۆژەکا تەنێ بوو. ھێزێن بەشدار شییان ل ڤێ ناڤچەیا کو ڤالاھیا ئەولەھیێ لێ ھەیە، ب کووراھیا 5 کیلۆمەتران ب پێش بکەڤن.

د وێ دەربارێ دا جیگرێ سەرفەرماندارێ پێشمەرگە لیوا قارەمان شێخ کەمال ژ بۆ K24ێ گۆت: “ئەڤ ئۆپەراسیۆنا کو ل سەر داخوازا وەزارەتا بەرەڤانیێ یا ئراقێ بوو، گەلەکا گرینگ بوو. د چەند رۆژێن بۆری دا ھەر دو ھێزان ئۆپەراسیۆنەکا ھەڤبەش ب کووراھیا 5 کیلۆمەتران ئەنجام دا، تێ دا ئەو ناڤچە ژ چەکدارێن داعشێ ھاتن پاقژ کرن و جھێن ڤەشارتنێ ژی ھاتن ژنابرن.”

ڤالاھیا ئەولەھیێ د ناڤبەرا پێشمەرگە و ئارتێشا ئیراقێ دا، ب درێژاھیا سینۆرێ ناڤچەیێن کوردستانی یە، داعش سوودێ ژ ڤێ ڤالاھیێ دبینیت و تێ دا خوە ڤەدشێریت.

ئەندامێ کۆمیتا پێشمەرگە ل پارلامەنتۆیا کوردستانێ سەید مستەفا ل سەر ڤێ ئۆپەراسیۆنا ھەڤبەش دبێژیت، ئەڤ ئۆپەراسیۆنە گرینگە، لێ دڤێت ئەو ڤالاھیا ئەولەھیێ یا د ناڤبەرا پێشمەرگە و ئارتێشا ئیراقێ دا ھەیی، بهێتە داگرتن، ئەگەر وەھا نەبیت، داعش دێ جارەکا دی ڤەگەریت وان ناڤچەیان.

ھەولێر و بەغدا ژ بۆ پێکانینا دو لیوایێن ھەڤبەش تا کو ڤالاھیا ئەولەھیێ یا ل ناڤچەیێن کوردستانی داگرن، د گوفتووگۆیان دا نە. نھا ئەو ھەر دو لیوا د قۆناغا راھێنانێ دا نە و بریارە د دو مەھێن بهێت دز، جھێن وان بێنە دیارکرن.