وەزارەتا بەرگریا ئامەریکایێ (پەنتاگۆن) راگھاندیە ھەماھەنگی و ھەڤکاریا ئامەریکایێ ژ بۆ ھێزێن سووریەیا دەمۆکراتیک (ھەسەدێ) ل رۆژئاڤایێ کوردستانێ تەنێ ژ بۆ رووبەرووبوونا شەرێ ل دژی تەرۆریستێن داعشێ یە.
بەردەڤکێ وەزارەتا بەرگریا ئامەریکایێ جۆن کربی د کۆنگرەیێ رۆژنەمەڤانی یێ ھەفتانە یێ خوە دا ئاشکەرا کر مەترسیا داعشێ هێژان ژی ل سەر رۆژئاڤایێ کوردستانێ و سووریێ مایە.
جۆن کربی ھەروەھا ئاشکەرا ژی کریە ھەماھەنگ و ھەڤکاریا ئامەریکایێ ژ بۆ ھەسەدێ تەنێ ژ بۆ رووبەرووبوونا ل دژی تەرۆریستێن داعشێ یە و ژ وێ زێدەتر ھیچ ھەڤپەیمانیەکا وان لگەل ھەسەدێ تونەیە.
د بەردەوامیێ ژی دا بەردەڤکێ پەنتاگۆنێ جۆن کربی ئاماژە ب وێ یەکێ ژی کریە ھەتا مەترسیا داعشێ ھەبیت ئەو دێ لگەل ھەسەدێ کار بکەن و دێ ھەڤکاری و ھەڤپەیمانیا وان لگەل ھەسەدێ بەردەوام بیت.
ھەسەدە ھێزا چەکداری یا رۆژئاڤایێ کوردستانێ یە و ب پشتەڤانیا ھێزێن ئامەریکایێ ل دژی داعشێ دورست بوویە و زۆرینەیا چەکدارێن وێ ژ یەکینەیێن پاراستنا گەل (یەپەگێ) بالێ سەربازی یێ پەکەکێ ل رۆژئاڤایێ کوردستانێ پێک دهێن.
