22 سال ب سەر پەسەندکرنا ئالایێ پیرۆز ل پارلەمانتۆیا کوردستانێ دەرباس بوون

22 سال ب سەر پەسەندکرنا ئالایێ پیرۆز ل پارلەمانتۆیا کوردستانێ دەرباس بوون

بەریا 22 سالان وەکە ئیرۆ د رۆژا 11/11/1999ێ پارلەمەنتۆیا کوردستانێ ئالایێ کوردستانێ پەسەند کر.

ب بریارەکێ بەریا 22 سالان پارلەمەنتۆیا کوردستانێ ئالایی کوردستانێ، وەکە ئالایێ فەرمی یێ حکوومەتا ھەرێما کوردستان ناساند و پشترا د رۆژا 19/6/2004 دا ژی بریار دا رۆژا 17ێ مەھا 12 یا ھەموو سالەکێ وەکە رۆژا ئالا کوردستانێ بهێتە پیرۆزکرن.

دیرۆکا ئالایێ کوردستانێ ڤەدگەریت سالا 1945ێ و 35 رۆژ بەریا دامەزرندنا کۆمارا کوردستانێ. پشتی نەھشتنا دەزگەھێن پاشایەتیا شاھێ ئیرانێ ل مەھابادێ رۆژا 17/12/1945ێ ئالا کوردستانێ ل سەر دەزگەھان ھاتە بلندکرن. پشترا د رۆژا راگھادنا کۆمارا کوردستانێ دا ئالایێ کوردستانێ ھات بلندکرن. واتە ئالایێ کوردستانێ د شۆرەشێن رۆژھلات و باشوورێ کوردستانێ دا ھەبوو.

پشترا ئالایێ کوردستانێ ل سەر دەستێ ژنا تەکۆشەرا کورد فاتما سەیدزادە حوسێنی ڤە ھاتیە چێکرن کو یەکەم ژنا کوردە کو ئالایێ کوردستانێ ب دەستێن خوە چێکریە و ئەو ئالایێ وێ چێکری د رۆژا 22/1/1946 دا د دەما راگھاندنا کۆمارا کوردستانێ ب ئامادەبوون پێشەوا قازی محەمەد و نەمر مەلا مستەفا بارزانی دا ھاتیە بلندکرن و وەکە ھێمایا ئیرادەیێ نشاندان.

پشتی رووخانا کۆمارا مەھابادێ ژ ئالیێ دژمنێن مللەتێ کورد ڤە ئالایێ کوردستانێ ژ ئالیێ قازی محەمەد ڤە ژ بۆ نەمر مەلا مستەفا بارزانی ھاتیە رادەستکرن. ژ وێ رۆژێ ھەتا ئیرۆ ئالایێ کوردستانێ وەکە سەمبۆلەکا نەتەوەیی د ھەموو شۆرەشێن مڵەتێن کورد ل رۆژھلات و باشوورێ کوردستانێ ھاتیە پاراستن و بکارئانین.

رامانێن چار رەنگێن ئالایێ کوردستانێ

سۆر: هێمایێ شۆرەشگەری و خوینی شەھیدێن مللەتێ کوردە ژ بۆ مافێن خوە.

سپی: ھێمایێ ئاشتی و ئاساییشێ ەێ کو مللەتێ کورد بەردەوام ئاشتیخواز بوویە.

کەسک: ژ سروشتا کوردستانێ ھاتیە و ھێمایێ ژیانێ یە.

زەر: مەبەست ژ 21 تیشکێن رۆژێ یە کو ھێمایێ سبەرۆژێ و د ھەمان دەمێ دا ژی ھێمایێ 21/3 یە کو دبیتە نەورۆز رۆژا نەتەوەیی یا کوردستانێ.

پوستێن ھەمان بەش