وه‌زاره‌تا ده‌رڤه‌یا یا ئیراقێ، ل ده‌ربارێ كۆچبه‌رێن ل سینۆرێ بیلارووس و پۆله‌ندایێ داخویانی دا و راگهاند كو ل رۆژێن پێش مه ئه‌مێ هه‌ولا ڤه‌گه‌راندنا كۆچبه‌ران بدن.
ئه‌حمه‌د سه‌حاف به‌رده‌ڤكێ وه‌زاره‌تا ده‌رڤه یا ئیراقێ، ب ئاژانسا فرانس پرێسێ گۆت كو ل رۆژێن پێش مه ئه‌مێ هه‌ولا ڤه‌گه‌راندنا وان كۆچبه‌ران بدن یێن كو ل سینۆرێ بیلارووس و پۆله‌ندایێ ئاسێ مانه و ده‌ست نیشان كر، كۆچبه‌رێن كو دخوازن ڤه‌گه‌رن، ئه‌مێ وان ڤه‌گه‌رینن.
هه‌روه‌ها دیار كر، هێژان هه‌ژمارا دروست یا كۆچبه‌رێن ئیراقێ، یێن ل سینۆرێ بیلارووس و پۆله‌ندایێ نه‌هاتییه زانین.
به‌رده‌ڤه‌كێ وه‌زاره‌تا ده‌رڤه دبێژه: ل ڤێ هه‌فته‌یێ گه‌شتێن ئاسیمانی ژ بۆی ڤه‌گه‌رینا كۆچبه‌ران ژ سینۆرێ بیلارووس، وێ وه‌رن ده‌ست پێ كرن.
ژ هێلا خوه ڤه، بالیۆزخانه‌یا ئیراقێ یا ل مۆسكۆیێ ئه‌شكه‌ره كر، وان ده‌ست ب تۆمار كرنا ناڤێن وان كۆچبه‌ران كرنه یێن كو دخوازن ڤه‌گه‌رن.
