رۆژنامەڤانێن رۆژئاڤایێ کوردستانێ دبێژن، پەکەکە و پەیەدە ناھێلن رۆژنامەڤان و چالاکڤانێن کو مینا وان ھزر ناکەن، ل رۆژئاڤا کار بکەن ژ بەر وێ ژی ھەتا نھا چەند رۆژنامەڤان ژ رۆژئاڤا بەرزە کرینە.
رۆژ ب رۆژ خەلکێ رۆژئاڤایێ کوردستانێ ب تایبەت رۆژنامەڤان و چالاکڤانێن سیاسی ژ ئالیێ رێڤەبەریا پەیەدێ و پەکەکێ ڤە زێدەتر تێن گڤاشتن و تەنگاڤکرن. تەنێ رۆژنامەڤانێن کو پەیایێن وانن یان ژی نێزیکی رێژیما سووریێ نە، دکارن ل ور کار بکەن، یێن دی دگرن یان ژی بەرزە دکەن.
رۆژنامەڤانەکێ کورد یێ رۆژئاڤایێ کوردستانێ ب ناڤێ بارزان لیانی کو ھاڤینا ئیسال ژ بەر کارێن رۆژنامەڤانیێ ژ ئالیێ رێڤەبەریا پەیەدێ ڤە ھاتبوو گرتن و پشتی چەندین مەھان پاشێ ھاتبوو بەردان، ژ بۆ باس نیوسێ بەحسا چاوانیا گرتنا خوە کر و گۆت، دەرەنگیا شەڤێ ھاتن ئەز گرتم و چاڤێن من گرێدان و ئەز برم جھەکی کو چ کەسەکێ نەدزانی ئەز ل کو مە.
بارزان لیانی ھەر وەھا گۆت، چەکدارێن پەیەدێ گۆتە من وەرن مە کار ب تە ھەیە لێ دەستوورا دادگەھێ بۆ گرتنا من نەبوو، ب سەرێ خوە ئەز گرتم.
وی رۆژنامەڤانی دا زانین ژی، دەما وی داڤێژن گرتیگەھێ چەند جاران پرس کریە ئەڤ دەر کودەرە و چما گرتیە لێ چ کەسی بەرسڤا وی نەددا و گۆت، لێ من دزانی گرتنا من ژ بەر را و نێرینا جودایە.
ب گۆتنا بارزان، ھەری کێم پێنج جاران لێپرسین ل وی کربوون و ھەموو ژی ل سەر ئازادیا رۆژنامەڤانی و نێرینێن جودا بوو و پشتی 3 مەھ و 22 رۆژان ئەو بەردان.
سەرۆکێ سەندیکایا رۆژنامەڤانێن رۆژئاڤایێ کوردستانێ، عومەر کۆچەر ژی گۆت، رەوشا نێرینا ئازاد و خەباتێن رۆژنامەڤانیێ ل رۆژئاڤایێ کوردستانێ کمباخە و ھەر رۆژنامەڤانەکێ کو نە ل گەل وان بیت نکاریت کار بکەت.
عومەر کۆچەر ھەر وەھا گۆت، رێڤەبەریا خوەسەر ئازادیەک تەمام دایە رۆژنامەڤانێن رژیمێ لێ رۆژنامەڤانێن نێزیکی ئەنەکەسێ دگریت، ئیشکەنجە دکەت و بەرزە دکەت و دشینیت ھەرێما کوردستانێ.
