ئەندامێ ئەنجوومەنا بلندا سیاسی و بەرژەوەندیێن یەنەکێ مەلا بەختیار رادگھینیت، “ئەز د ناڤا یەنەکێ دا ھاتم ژەھریکرن.”
ئەندامێ ئەنجوومەنا بلندا سیاسی و بەرژەوەندیێن یەکیتیا نشتمانییا کوردستانێ (یەنەکێ) مەلا بەختیار، ئیرۆ کۆنفەرانسەکارۆژنامەڤانی دەربارێ ژەھریکرنا خوە دا گرێدا.
مەلا بەختیار گۆت: “تاوانا ژەھریکرنا من د ئاستا ھەری بلندا بژیشکی دا ھاتیە چەسپاندن. ئەز سەدی سەد ژ مرنێ ڤەگەریامە. ئەز د ناڤا یەنەکێ دا ھاتم ژەھریکرن. دو – سێ مەھان بەری 8 تیرمەھێ ئەڤ تاوان ل ھەمبەر من ھاتە کرن.”
گۆت ژی: “زانیاری گھیشتن من کو ئەز د ناڤا دەزگەھا زانیاری (ئیستخباراتا یەنەکێ) دا ھاتمە ژەھریکرن.”
ھەروەھا گۆت: “ژەھریکرنا من تاوانەکا سیاسی و حزبییە.”
مەلا بەختیار تەکەز کر: ” یا ل یەنەکێ ھاتیە کرن ژ ژەھرکرنا من مەترسیدارترە. مەترسی د وێ دەایە، پشتی کۆنگرەیا چارەم، یەنەکێ باوەریا ئەندامێن خوە ژ دەست دا. یەنەکێ نێزیکی 300 ھەزار دەنگ د ھلبژارتنان دا کێم کرن.”
مەلا بەختیار گۆت: “دەما من زانی کو ئەز ھاتمە ژەھریکرن، ژ بلی مالبات و ھندەک ھەڤالێن خوەیێن نێزیکی، من کەسەک ب وێ یەکێ ئاگاھدار نەکر. پشتی چووم عەممانێ و ئەنجامێن تەستێ دەرکەتن، من ئەنجام ژ بۆ ھەڤال بافل، دەزگەھا زانیاریێ و در. خەسرۆ شاندن.”
دیار کر ژی: “پشتی عەممانێ ڤەگەریام سلێمانیێ و من 2 جاران ھەڤدیتن لگەل ھەڤال بافل و جارەکێ ژی لگەل بەرپرسێ دەزگەھا زانیاریێ دا کر و پشترا ژ بۆ وەرگرتنا چارەسەریا بزیشکی، چووم ئالمانیایێ.”
مەلا بەختیار تەکەز کر: ‘ل نەخوەشخانەیەکا ھەر باش من چارەسەری وەرگرت و نھا چ ژەھر د لەشێ من دا نەمایە.”
مەلا بەختیار دیار کر، ئەو دێ دەربارێ ژەھریکرنا وی دا سکالایێ ل دادگەھا کوردستانێ تۆمار کەت و ئەگەر ئەنجام نەدا، ئەو دێ چیتە بەغدایێ و ئەگەر ل وێرێ ژی ئەنجام نەدیت، ئەو دێ سکالایێ ل دەرڤەیی وەلات تۆمار کەت.
