ئه‌مەریکا ئامادەکاریيا سزادانا بیلارووسێ دکەت

belarus refugees poland-usa (2)

ژ بەر کریزا کۆچبەران يا ل سەر سنۆرێ پۆله‌ندايێ، ئه‌مەریکا بریار دایە بیلارووسیا جەزا بکەت، سەدەما جەزایان ژی هەلوەستا حکوومەتا بیلارووس یا نەمرۆڤی یە.

ب سەدەما کریزا کۆچبەران یا ل سەر سینۆرێ بیلارووس – پۆلوندایێ، گڤاشێن ناڤدەولەتی ل سەر حکوومه‌تا بیلارووسێ زێدە دبن. مینسک ب وێ یەکێ تێ تۆمەتبارکرن کو ب زانەبوون کۆچبەران ل سەر سنۆرێ پۆله‌ندایێ کۆم دکەت.

بەردەڤکێ وەزارەتا دەرڤە یا ئه‌مەریکایێ نێد پرایس راگه‌هاندییە، ژ بەر هەلوەستا نەمرۆڤی یا حکوومەتا بیلارووسێ ئەو ب هەماهەنگی ل گەل یەکێتییا ئەورۆپایێ و هەڤپەیمانێن دی، ئامادەکارییا دانانا دۆرپێچان و سەپاندنا سزایان ل سەر بیلارووسێ دکه‌ن.

هه‌روه‌ها گۆتییە، دڤێ رێڤەبەرییا د بن سەرۆکاتییا ئالیخاندەر لوکاشەنکۆ دا، بەرپرسیارییا ئێریشێن ل هەمبەری دەمۆکراسی، مافێن مرۆڤ و پرەنسیپێن ناڤدەولەتی هه‌لدگریت.

ب هەزاران کۆچبەرێن کو ژ ئافریکا و رۆژهلاتا ناڤین دەرکەتنە، ژ بۆ دەرباسی وەلاتێن ئه‌ورۆپایێ ببن، ئەو چەند هەفتینە کو ل سەر سینۆرێ بیلارووس و پۆله‌ندایێ کۆم بوونە و هەتا نها 8 کۆچبەران جانێ خوە ژ دەست دانە و ژ بەر داکەتنا پلەیێن گەرمایێ ترس هەیە کو کارەساتەکا مرۆڤی چێببیت.

حکوومەتا بیلارووس ل دەڤەرا سنۆری رەوشا ئاوارتە راگه‌هاندییە و ناهێلیت رێخستنێن مرۆڤی و رۆژنامەڤان ژی نێزیکی وێرێ ببن.