دادگەها واشینگتۆنێ یا پایتەختا ئه‌مەریکا، چالاکڤانەکێ پشتەڤانێ سەرۆکێ بەرێ دۆنالد ترامپ، ب سووچا بەشداربوونا د ئێریشا ل سەر بارەگەها کۆنگرێسا ئه‌مەریکی دا، ب 41 مەهـ زیندانكرنێ مەحکووم کر.
دۆزگەریێ ژ بۆ «جایكۆب چانسلی» یێ 34 سالی، ژ 4 سالان زێدەتر جەزایێ گرتیگەهێ خواستبوو، ژ بەر به‌شداربوونا وی د بوویەرێن خوینرێژێن کۆنگرێسێ دا کو ب سەدان کەس تێدا هاتبوون سووچدار کرن.
جایكۆب د چلەیا رابووری دا ب كۆمێ خوه یێ كو دو شاخ ل سه‌رن، به‌شداری ئێریشا سه‌ر باره‌گه‌ها كاپیتۆلێ كربوو و ژ وێ دەمێ ڤە ژێ ب “دو ئه‌ل قه‌رنه‌ین” هاتە ب ناڤ کرن.
جایكۆب د ئیلۆنا رابۆری دا دەرکەت پێشبەری دادگەهێ، ل سەر بنگەها سووچا به‌شداربوونا د ئێریشا سەر بارەگەها کۆنگرێسێ دا ل گەل ب سەدان ئالیگرێن ترامپ، د هەولەکێ دا ژ بۆ نەهشتنا پارلەمانتەران ژ پشتراستکرنا سەرکەفتنا جۆ بایدن د هه‌لبژارتنێن سەرۆکاتیێ دا.
ل ئادارا رابووری، سەرۆکێ بەرێ یێ ئه‌مەریکی دۆنالد ترامپ بەرەڤانی ژ خوه‌پێشانده‌ران و ئێریشكارێن سه‌ر كاپیتۆلێ كربوو و گۆتبوو: خوەپێشاندەرێن کو ئێریشی کۆنگرێسێ کرنه “چ مەترسی نینن”.
هێژای گۆتنێ یه، د وان بوویه‌ران دا 5 ژ وان كه‌سێن كو به‌شداری ئێریشا سه‌ر باره‌گه‌ها كۆنگرێسێ كری، ژ هێلا هێزێن ئه‌وله‌هیێ ڤه هاتبوون كوشتن.
