بژاردەیێن پێشبینیکری ل پێش رۆژئاڤایێ کوردستانێ چنە؟

بژاردەیێن پێشبینیکری ل پێش رۆژئاڤایێ کوردستانێ چنە؟

ژ دەما کو ترکیێ گەفا ئەنجامدانا ئۆپەراسیۆنەکا لەشکەری یا نوو کریە، هەتا ئیرۆ ژ بلی کو رەوشەکا تەڤلیھەڤ ل جەم گەلێ رۆژئاڤایێ کوردستانێ چێ کریە، چارەنڤیسێ بەشێ مایی یێ رۆژئاڤایێ کوردستانێ نە دیارە و چاڤدێر ددەنە دیارکرن کو سێ بژاردە ھەنە، ئەو ژی ڤەگەرا رێژیمێ، یان دەرباسبوونا تورکیێ یان ژی ئەگەر دانووستاندن ناڤبەرا ئەنەکەسێ و پەیەنەکێ دا ب سەر کەڤن، ئەو دەڤەر دێ د بن ھەژموونا ئەمەریکایێ دا بمینن و مەترسیا ڤەگەرا رژیم یان دەرباسبوونا ترکیێ دوور دکەڤن.

ھندەک ژێدەرێن تورکی دانە زانین کو ئۆپەراسیۆنا تورکی ھاتە راوەستاندن ژ بەر کو دانووستاندن ناڤبەرا ترکیێ، رووسیا و ئەمەریکایێ دا بەردەوام دکەن، لێ ھێژ گوشارا راگھاندنی بەردەوامە کو دێ ئۆپەراسیۆنێ ئەنجام دەن، نەخاسمە ژ ئالیێ کۆمێن چەکدار ڤە کو د ئامەدەباشیێ دا نە ل بەندا چرایێ کەسکن.

فادی مەری سەرۆکێ نڤیسگەھا پەیوەندیێن گشتی یێن شەپێلا پێشەرۆژا کوردی ل سووریێ د ڤێ دەربارێ دا دا زانین کو ئەگەرەک مەزن هەیە کو رژیم ڤەگەریت وان ناڤچەیان، ژ بەر کو دۆسەیا سووریێ ئێدی د دەستێ رووسیێ دایە، رووسیا دخوازیت رژیم ڤەگەریت ھەر دەڤەرەکێ. ژ ئالیێ خوە نووری بریمۆ د لێدوانەکا خوە ژ بۆ ئارکێ تەکەز کر کو سیناریۆیا ڤەگەرا رێژیمێ نە دوورە، لێ ترکیا کۆبانێ و مونبجێ ژ بۆ رژیمێ بەرنادەت.

سیاسەتمەدار دبینن کو ئەگەر دانووستاندن ناڤبەرا ئالیێن کوردی دا ب سەرپرەشتیا ئەمەریکا ب سەر کەڤن ئەڤ سیناریۆیا وەکە کارەساتا عەفرین، سەرێ کانیێ و گرێ سپی دوبارە نابیت و رۆژئاڤا دێ بیتە ھێرێمەکا ھەژموونا ئەمەریکایێ.

ھە د ڤێ دەربارێ دا فەرماندارێ قەسەدێ مەزلووم کۆبانێ ژ بۆ کەنالا ئەلعەربیە پشتراست کر ناھێلن رژیم ڤەگەریت، ھەروەھا نووری مەحموود بەردەڤکێ یەپەگێ ژی ئانی زمان کو ئەو دێ ب ستراتجیەکا نوو بەرەڤانیێ کەن و ھەر ئێریشەک بهێتە ئەنجامدان نەخاسمە ژ ئالیێ ترکیێ ڤە ئەو دێ بەرخوەدانێ کەن.

بەرووڤاژی ڤان داخویانیان، ژ بلی ھەڤسەرۆکا مەسەدێ ئیلھام ئەحمەد کو دابوو زانین د مژارا عەفرینێ دا شاش بوون و دڤێت ب دیالۆگێ چارەسەر بھاتبا کرن، ریاز دراد کو ھەڤسەرکێ مەسەدێ یە، گۆت کو دەما شەرێ عەفرینێ دا شاش بوون.

تەڤی کو ژێدەرێن تورکی تەکەز کرن کو ئامادەکاریێن ئۆپەراسیۆنێ ھاتینە راوەستاندن، لێ دیسا ژی مەترسیەکا جدی ھەیە کو سیناریۆیا عەفرینێ دوبارە ببیت، ژ بەر کو پەیەدە ھەردەم بەهانەیان ددە دەستێ ترکیێ کو پەکەکە ل رۆژئاڤایێ کوردستانێ یە، ئەو ژی جھێ دل نەرەحەتییا ترکیێ یە و کار دکەت کو وان مەترسیان ل سەر سینۆرێ خوە نەھێلیت.