ب بریارا دادگەهێ کەسەکێ دی ژ تۆهمەتبارێن دۆسیەیا کوشتنا 7 ئەندامێن مالباتا کورد يا ل پارێزگەها کۆنیایێ هات ئازاد کرن، ب ڤێ بریارێ ژ 13 کەسێن کو ب تۆهمەتا دەستێ وان د کۆمکوژيیا وێ مالباتێ دا هەبوویە، 12 هاتن ئازاد کرن.
رۆژا ئینی 19/11/2021ێ چارەمین دادگەها جەزایێن گران يا کۆنیایێ، بریارا ئازادکرنا «ئیبراهیم کەلەشێ» خزمێ نێزیکێ «مەهمەت ئالتون» کوژەرێ مالباتا کورد یا پارێزگەها کۆنیایێ دا.
دادگەها کۆنیایێ 19ێ جۆتمەها 2021ێ دەربارێ تۆهمەتبارێ سەرەکی یێ کوشتنا وێ مالباتا کورد «مەهمەت ئالتون» دا جەزایێ هەفت جار زیندانکرنا هەتا هەتایێ دابوو، هەروها داییک، باڤ و هەڤژینا وی هاتبوون ئازاد کرن.
ئێڤارا رۆژا ئینێ 30ێ تەمووزا 2021ێ، 7 ئەندامێن مالباتەکا کورد ل ناڤچەیا مەرام يا باژارێ کۆنیا یێ ترکیێ، ب چەکێ هاتن کوشتن کو 4 ژ وان ژن بوون، کوژەرێ وێ مالباتا کورد، بۆ ڤەشارتنا تاوانێ، ئاگر ب مالا وێ مالباتا کورد خست.
پشتی بوویەرێ، سەرۆکاتییا هەرێما کوردستانێ و سەرۆکوەزیرێ هەرێما کوردستانێ، ب توندی ئەو بوویەر شەرمەزار کرن و داخوازا جەزاکرنا کوژەران کرن.
ئالیێن ئۆپۆزسیۆنا ترکیێ ژی نەرازیبوون پێشاندان و ئاكه‌په ب دەرخستنا تەڤلیهەڤی، سیاسەتا کین و نەفرەتێ و دژایەتیکرنا کوردان تۆهمەتبار کرن.
