وەزارەتا پێشمەرگە یا حکوومەتا هەرێما کوردستانێ بەرسڤا وەزیرێ به‌رگریێ یێ ترکیێ ددەت و رادگه‌هینیت: «گۆتنێن وەزیرێ به‌رگریێ یێ ترکیێ هولوسی ئاکار یێن ل دەربارێ ئینکارکرنا کوردستانێ، جهێ حێبه‌تیێ نه».
وەزارەتا پێشمەرگە د داخویانیەکێ دا راگه‌هاند، «گۆتنێن وەزیرێ به‌رگریێ یێ ترکیێ هولوسی ئاکار یێن ل دەربارێ ئینکارکرنا کوردستانێ، جهێ حێبه‌تیێ نه، ژ بۆ مە جهێ پرسێ یە کەسەک د پێگەهەکێ فەرمی یێ دەولەتێ دا بیت و رێ بدەته خوە راستییەکا دیرۆکی، دیمۆگرافی و جیۆگرافی ئینکار بکەت کو د راستیێ دا باوەرییا وی ب خوە ب وێ ئینکارێ ناهێت».
وەزارەتا پێشمەرگە دبێژیت: «ئەو برێزە (هولوسی ئاکار) ب خوە ژی سەره‌دانا هەرێما کوردستانێ کرییە، بلا ژ بۆمه بێژیت کا ئەو دەڤەرا وی سەره‌دانا وێ کری، كیڤه‌یه و ناڤێ وێ چی یە؟
د داخویانیێ دا هات گۆتن: «ئەگەر گومانا ڤی برێزی ژ هەبوونا جیۆگرافیایا کوردستانێ هەیە، بلا ل بەلگەنامەیا و دیرۆکا ئۆسمانییان بنێریت، دێ بۆ وی دیار بیت كا کوردستان هەیە یان نا».
وەزارەتا پێشمەرگە تەکەز دکەت: «هزرا ئینکارکرنا مللەتەکی و جیۆگرافییا وی، هەر دەم ژێدەرا پرسگرێک و کێشەیان بوو و ناگه‌هیته چ ئەنجامەکێ».
