ژ بەرکو پەکەکە نکاریت ل سەر ناڤێ خوە و ب ئاوایەکی ئاشکەرا بەشداریێ د هلبژارتنێن هەرێما کوردستانێ و ئیراقێ دا بکەت، کادرێن خوە یان د ناڤا هندەک پارتیێن باشوور دا یان ژی د بن ناڤێ کەسێن بێ لایەن ژ بۆی هلبژارتنان کاندید دکەت و ب رێیا رەخنەکرنا حکوومەتا هەرێما کوردستانێ و ئاخافتنێن خوە یێن دوور ژ ئەخلاقێ کوردستانی وان ب خەلکی ددەتە ناساندن و د هلبژارتنان دا دشینیت پارلەمانی.
یەک ژ وان قەیۆمێن پەکەکێ د ناڤا پارتیێن باشوورێ کوردستانێ دا «ئیسرا محەمەد رەجەب ئەلشامری»بوو، کو پەکەکێ ئەڤ کەسە ل سالا 2018ێ، ل سەر لیستا نفشێ نوو «نەوەی نووێ» نامزەد کربوو و شاندبوو پارلامانێ ئیراقێ، لێ د هلبژارتنێن ئیسال یێن ئیراقێ دا ئەڤ قەیووما پەکەکێ ب هەژمارا 23 ل سەر لیستەیا ب ناڤێ «تەحالف ئەلفەتح» ل مووسلێ هاتبوو نامزەد کرن.
چاڤکانیێن پێگەها دارکا مازی ل باشوورێ کوردستانێ ئاشکەرا کرن، ئەڤ قەیووما پەکەکێ کو پێش نها د ناڤا حیزبەکا هەرێما کوردستانێ دە جی دگرت، د هلبژارتنێن ئیسال یێن ئیراقێ دا د ناڤا لیستەیا ب ناڤێ «تەحالف ئەلفەتح» یا کو میلیشیایێن شیعە یێن ب ناڤێ «عەسائیب ئەهل ئەلحەق» و «حاج عەلی ناسری» یێ شێورمەندێ سوپایێ پاسدارێن ئیرانێ پشتەڤانیێ ل دکەن جی دگرت.
چاڤکانیێن مە هەر وەها راگهاند، ئیسرا محەمەد رەجەب ئەلشامری، هەماهەنگیەک موکم لگەل پەکەکێ دا هەبو و پرانیا کارێن گرێدایی کامپا مەخموورێ ژ لایێ وێ ڤە د ناڤا حکوومەتا ئیراقێ دا دهاتن جێبەجێکرن.
ئەڤ کاندیدا پەکەکێ ژی وەکە کاندیدێن دی یێن پەکەکێ ب تایبەتی یێن ل شەنگال و سلێمانیێ سەرەرای پشتگیریا حەشدا شەعبی و سوپایێ پاسداران نکاری دەنگێن پێویست ب دەست بێخیت و دیسا د ناڤا پارلامانتۆیا ئیراقێ دا جی بگریت، هندەک شرۆڤەکارێن سیاسی ژی ددن خوەیا کرن کو روویێ راست ئێ پەکەکێ ژ هەر کەسەکی رە ئەشکەرە بوویە، ژبەر ڤێ یەکێ ئێدی ت کەس باهوەر ب پرۆپاگاندا و سۆزێن وێ ناکە و دەنگ نادە کەسێن نێزی پەکەکێ.
