شرۆڤەکارەکێ سیاسی: پەکەکە رێکێ نادەت کورد بگەھنە مافێن خوە

شرۆڤەکارەکێ سیاسی یێ رۆژئاڤایێ کوردستانێ راگەھاند، پارتیا کارکەرێن کوردستانێ (پەکەکە) رێ نادەت گەلێ کورد ب چ رەنگا بگەھنە مافێن خوە.

شرۆڤەکارێ سیاسی یێ رۆژئاڤایێ کوردستانێ مەنال خەلیل حەسکۆ راگەھاند: رەژیما سووریێ مافێن گەلێ کورد ل سووریێ ناسناکەت و بەلگەیا ھەری مەزن ژی ژ بۆ ڤێ یەکێ ئەوە مافێ ھەموەلاتیبوونێ نادەتە کوردان.

مەنال خەلیل حەسکۆ رەخنە ل دانووستاندن و گوفتووگۆیێن پەکەکێ و پەیەدێ یێن ل گەل رەژیما سووریێ گرتن و گۆت: ئەزموونێن مە ل گەل رەژیما سووریێ ئاشکەرا دکەن کو ئەڤ رەژیمە چ دەمەکێ مافێن گەلێن کورد ناسناکەت.

ڤی شرۆڤەکارێ سیاسی دیار کر، ژ بەر ھەبوونا پەکەکێ یا ناڤ لیستەیا تەرۆرێ و دەست بسەردا گرتنا رۆژئاڤایێ کوردستانێ یا ژ ئالیێ وێ پارتیێ ڤە، بوویە سەدەم ئەو بەشێ کوردستانێ ببیتە قادا شەری و پرسگرێکێن ناڤبەرا ترکیا و ئیرانێ و پەکەکێ.

مەنال خەلیل حەسکۆ دبێژیت، زەحمەتە ئەنجوومەنا نیشتیمانی یا کورد ل سووریێ (ئەنەکەسە) رێکەفتنێ ل گەل پەیەدێ پێکبینیت، ژ بەر کو پەکەکە پرۆژەیەکێ داگیرکەرێن کوردستانێ یە و ب ھەموو ئاوایەکێ دژی رێکەفتن و نێزیکبوونا کوردان رادوەستیت.

ئەڤ چاڤدێر و شرۆڤەکارێ سیاسی دبێژیت، پەکەکە ل باکورێ کوردستانێ ژ ئالیێ سازیا ئیستخباراتا ترکیێ ڤە و ل رۆژھلاتێ کوردستانێ ژی ژ ئالیێ سوپایێ پاسدارێن ئیرانێ ڤە دهێتە برێڤە برن، ھەروەھا ل ئیراقێ ژی بوویە ھێزەکا میلیشیا یا سەر ب حەشدا شەعبی و ل رۆژئاڤایێ کوردستانێ ژی بوویە پارێزڤانێ رەژیما ئەسەد و ب وی ئاوایی پەکەکە رێ نادەت کورد ب چ رەنگان بگەھنە مافێن خوە.