مه‌دیایا په‌كه‌كێ، كارێن خوە یێن کو چ نرخێن وان یێن ئەتیک نینە و ل سەر درەو و ئیفترایێ ئاڤاکرینە، بێناڤبەر د دۆمینە، ل گۆر مەدیایا په‌كه‌كێ، ل کوردستانێ ژ په‌كه‌كێ راستتر و درستر چ تەڤگەرەک نینە، ژبلی په‌كه‌كێ هەموو پارتیێن کوردان و کەسێن کو پشتگریێ دده‌نه وان پارتییان ئاژانن، ب پەرەیان هاتنە کڕین، ل گۆری په‌كه‌كێ ئەگەر ئەو نەبانه، ل سەر روویێ ئەردی تشتەک ب ناڤێ کوردان نەدبوو و نەدما، ل گۆری په‌كه‌كێ تنێ شەرڤانێن وان قەهرەمانن، هەر هێزەکا دی یا چەکداری خائین و سیخۆره.
قەی تشتەک نینە کو په‌كه‌كێ ئیفلاح بکەت؟
په‌كه‌كە ڤان تشتان گه‌له‌ك ب شانازی، پۆزبلندی و ڤەکری دبێژیت، ئێدی مرۆڤ دکەڤیتە گۆمانان قەی تشتەک نینە کو په‌كه‌كێ ئیفلاح بکەت؟ نە رەخنە، نە شیرەت و نه ژی هەڤالبەندی دكاریت په‌كه‌كێ ژ ڤێ پۆزبلندیێ دووربێخیت، هوون چ بکه‌ن ژی هوون نکارن چارەسەر بکه‌ن، ژ بەر کو په‌كه‌كە تەنێ ژ بۆ وێرانکرن، قەداندن و تونەکرنێ ل سەر دەستکەفتێن هێزێن مه‌حرووم هاتییە دامەزراندن.
یێن دەستێ دۆستانیێ درێژی په‌كه‌كێ کری، پشتی دەمەکی دێ بینن کو وان ملێ خوە وندا کرییە، میناکا ڤێ یا هەری باش «ئێكه‌تی» یه، یەک ژ ئه‌گه‌رێن سەرەکی یێن وندابوون و پارچەبوونا ئێكه‌تیێ یا ئیرۆ، ئەو ده‌ستبه‌ردانن کو ئێكه‌تیێ ژ سالا 2013 ێ بۆ په‌كه‌كێ كرین، ئه‌ڤه بوو ئه‌گه‌ر کو په‌كه‌كە ب خوە بکەڤیتە ناڤ مالا ئێكه‌تیێ، په‌كه‌كە ژ کولتوورا کەمال و مەرعریفەتا کوردایەتی دوورە، ئەو خودانا پیڤان و ئەخلاقێ چەپێن کەمالیستێن ترکانە.
هوون ل گەل په‌كه‌كێ هەڤال ژی بن، ئەو دێ دیسا هه‌ول ده‌ت وە تونە بکەت
واته هوون ل گەل په‌كه‌كێ هەڤال ژی بن، ئەو دێ دیسا بخوازیت وە تونە بکەت، پارچەیەکێ ژ وە قود بکەت روونیته شوونا وە، نەمازە هەکە خستبیتە هشێ خوە، دێ هەزار و یەک به‌هانه‌یان پەیدا بکەت کو ل دژی وە شەڕ بکەت، گەر هەوجە بکەت کو ژ بۆ بەرژەوەندییا خوە وە تونە بکەت، دێ بنگەهەکێ تەئۆریک چێكه‌ت، دێ رۆژانە ل دژی وە گۆتگۆتکان بەلاڤ کەت، دێ جه‌وه‌كێ فه‌وزایێ چێكه‌ت، دێ تێكدانێ ئاڤا كه‌ت، دێ هەر به‌هانه‌یه‌كێ بینیت کو هێرشی وە بکەت، دبیت خەلەتییا هەره مەزن یا پارتیێن کورد ئەوە کو ئه‌و ل بەندا لهەڤهاتنەکێ نه دگه‌ل په‌كه‌كێ، ئه‌ڤ پارتییه ئالۆزی و ناکۆکیێن دگه‌ل په‌كه‌كێ، وەک کێشەیێن دەمکی شرۆڤەکرینە، ئەڤێ ژی وه‌كر کو په‌كه‌كە بهێز بکەڤیت.
مژارا په‌كه‌كێ کا چاوا وێ ئالتەرناتیڤێن خوە ژ بۆ کو جهـێ خوه قائیم بكه‌ت ژناڤبرن و چاوا به‌رێ خوه دا رێبازێن هێرشکار و تەپەسەرکەر، د ناڤا جەوێ سیاسیێ کوردان دا هێژان ب تێرا خوە نەهاتییە لێكۆلین و ئه‌شكه‌ره كرن.
پارتیێن باکورێ کوردستانێ ژی، کو د سالێن 70 و 80یێ دا په‌كه‌كێ کادرێن وان یێن هەره ب قیمەت دکوشتن، هێژان ژی دربێ کو په‌كه‌كێ ل وان دایە ب تێرا خوە فێم نەکرنە، ئه‌گه‌را بنگەهین یا مارژینالبوونا پارتیێن باکوور ژی ئەوە کو ئه‌و ڤی ئالیێ په‌كه‌كێ نابینن و ل گۆری ڤێ تەڤناگەرن.
دبیت کو تێگەها «قصاص» کرنێ ل هەر دەرێ نەراست بیت، لێ راستییەکا تێکۆشینێ هەیە: دڤێت هوون ب زمانەکی کو ئەو ژێ فێم بکه‌ن ل دژی خرابکار و چەتەیان شەڕی بکه‌ن، هوون نکارن دگه‌ل رێخستنەکا مافیایێ روونن و د چارچووڤەیا پیڤانێن دەمۆکراتیک دا په‌یوه‌ندییان دگه‌ل پێشبێخن و بێژنێ هوون خەلەتن، پێویستە ب زمانەکێ کو ئەو ژێ فێم دکه‌ن بەرسڤ بهێته دان.
ئه‌گه‌را کو په‌كه‌كە ئەڤ قاس هێرشکار بوویە ئەوە، ب زمانێ کو ئەو ژێ فێم دکەت بەرسڤا وێ نەهاتییە دان
سەدەما کو په‌كه‌كە ئەڤ قاس هێرشکار بوویە ئەوە، ب زمانێ کو ئەو ژێ فێم دکەت بەرسڤا وێ نەهاتییە دان، په‌كه‌كە هێرشی پیرۆزیێن هەر کەسی دکەت، زماندرێژیێ ل سەر هەر تشتی دکەت، ل سەر هەر تشتی نیقاشان دکەت، حەقارەتێ ل هەر تشتی دکەت، ژ هەر تشتی را دبێژیت خائین، ل هەمبەری ڤێ زماندرێژی و رێبازا هێرشکارا په‌كه‌كێ، ژبلی چەند دەنگێن كێم چ بەرسڤەک بهێز ناهێته دان، د قادا سیاسی دا دبێژنه ڤێ ئێكێ «تێکۆشینا ژ بۆ هەبوونێ»، ئانكو هەمان ئاستا بەرسڤدانێ، ئەڤه نە تۆلهلدانەکا گوندیانە، ئەڤه تێگەهەکێ ناڤنەتەوەیی و دیپلۆماتیکە.
ب کورتی هەموو جنایەت، کوشتن، ته‌سفییه و کریارێن كو په‌كه‌كێ کرینە، ب هەمان شێوازێ بەرسڤ نەدانێ، هێلا کو په‌كه‌كە سەرخوە دا بچیت، وەک زارۆکێن داخوازکەر هەتا کو شەقەکێ لێنەدی، ئەو ناسەکنیت، ئەم میناکەکێ بده‌ین: مەدیایا په‌كه‌كێ ئەڤه چه‌ند رۆژن خزم و كه‌سوكارێن هندەک پێشمەرگەیێن رۆژ ب گۆتنێن وەکی وەرن تەسلیم ببن، دەردئێخیت سەر تێله‌فزیوونان و 24 ده‌مژمێران د وەشینیت، ژ بەر چ ئه‌گه‌رێ بیت بلا، ئەڤ کەسه بانگا چ دکه‌ن بلا بکه‌ن نه گرنگە، یا گرنگ ئەوە کو ئەڤ پێشمەرگەیێن رۆژ یێن ب سەدان شەهید داینە و ل به‌ره‌یا شەرێ ل دژی داعشێ و حه‌شدا شه‌عبی شەر کرینە، خودان رۆلەکی پڕ بەرزن، لێ په‌كه‌كە تەنێ ژ بۆ ڤەشارتنا پەیوەندیێن خوە دگه‌ل شامێ، ڤێ هێزا ژ کوڕ و کەچێن رۆژئاڤایێ كوردستانێ پێکهاتی، وەک چەتە دەستنیشان دکەت.
په‌كه‌كە شێوازێ دەولەتا ترک بکار دئینیت، لێ ب دەهان کەسێن کو ژ په‌كه‌كێ ڤەقەتیایین هەنە، رۆژەکێ ژی باشوورێ کوردستانێ ئەڤ ڤه‌قه‌تیایه دەرنەئێخستنه سەر شاشه‌یێن تێلەڤیزیۆنێن خوه.
د ڤان 3 سالێن داویێ دا نێزیکی 60 ژنێن ب دوگیان ژ په‌كه‌كێ رەڤیانه
وەکە میناک بێژین، د ڤان سێ سالێن داویێ دا نێزیکی 60 ژنێن ب دوگیانی خوە سپارتینە هێزێن ئەولەهیێ یێن حکوومەتا هەرێما کوردستانێ، ل هەمان دەمێ، کەسێن کو ل رۆژئاڤا د زیندانان دا مابوون و ب مەهان ئه‌شکەنجە ل وان هاتبوو کرن و د یەک حوجرەیێ دا هاتبوونه راگرتن ژی خوە سپارتن هێزێن پێشمەرگەی، لێ ئەڤ کەسە رۆژەکێ ژی د تەلەڤیزیۆنان دا نەهاتن وەشاندن، ب دەهان مالباتێن کو ژ بۆ زارۆکێن خوە ببینن چوون قەندیل و گاره‌ی، ئه‌و راستی هێرش و کرێتکرنا په‌كه‌كێ هاتن و وان خواستن ب رێیا تەلەڤیزیۆنێ رەوشا خوە ب رایا گشتی را بگه‌هینن، لێ حکوومەتا هەرێما کوردستانێ نەخواست کێشه‌یێن ناڤخوەیی مەزن بکەت، له‌وما ژی ئەو هەولدان هاتن ئاستەنگ کرن.
ب چەتەیان را دۆستانی نابیت
ئەو ژنێن کو ژ بن پۆزێ جەمیل باییک و موراد قارایلان رەڤیاینە، هەکە بئاخڤن، ب ئحتیمالەکا مەزن ئاخفتنێن وان دێ ژ گۆتنێن وی کەسێ دبێژیت «نەبن پێشمەرگەیێن رۆژ» گەلەک بالکێشتر بن، هەم د ئاستێ ئەخلاقی هەم ژی ماگازینی دا، لێ کەسێ ئەڤ یەک ب په‌كه‌كێ نەکر، له‌وما ژی په‌كه‌كێ رۆژ ب رۆژ بێئەخلاقتر هێرش برنه سەر نرخێن کوردان، وەک کو مە گۆتی، «ب چەتەیان را دۆستانی نابیت»، دڤێت ب زمانێ کو ئه‌و تێدگه‌هن بەرسڤا چەتەیان بهێته دان.
