وەزارەتا پێشمەرگە راگه‌هاند؛ بریکارێ وەزارەتا پێشمەرگە سەربەست لەزگین، ب ئامادەبوونا شێورمەندێ بلندێ وەزارەتا پێشمەرگە هەژار عومەر پێشوازی ل جیگرێ رێڤەبەرێ شێورمەندێن هێزێن هەڤپەیمانان یێ ل هەرێما کوردستانێ کۆلۆنێل تاد بۆرۆس و شاندا پێره کرن.
ل گۆر داخویانییا وەزارەتا پێشمەرگە، ل سەر گەشەدانێن هەری داوی و پێنگاڤێن پرۆسەیا چاکسازیێ یا ل ناڤ هێزێن پێشمەرگە و مژارا رێکخستنا یەکەیێن جودایێن هێزێن پێشمەرگە و مەکانیزما رێکخستنا وان هاتن گۆتوبێژکرن.
وەزارەتا پێشمەرگە ئەشکەرە کر؛ د جڤینا ناڤبەرا بریکارێ وەزارەتا پێشمەرگە و جیگرێ رێڤەبەرێ شێورمەندێن هەڤپەیمانان دا بەحسا پێنگاڤێن پێکانینا دو لیوایێن هەڤبەشێن ناڤبەرا هێزێن پێشمەرگە و ئارتێشا ئیراقێ هات کرن.
هەروه‌ها تەکەزی ل سەر کارێ هەڤبەش و هەماهەنگییا ناڤبەرا وەزارەتا پێشمەرگە و وەزارەتا بەرەڤانی یا ئیراقێ کرنە ب هەماهەنگی و پشتەڤانییا هێزێن هەڤپەیمانان ژ بۆ تێکبرنا داعشێ.
بریکارێ وەزارەتا پێشمەرگە رۆلا هەڤپەیمانان و د ناڤ وان دا ژی رۆلا ئه‌مەریکایێ بلند نرخاندییە د پێشکێشکرنا ئالیکاریێن لۆژیستیک و شێورمەندییا وان ژ بۆ پێشمەرگە دا.
د داخویانیێ دا هەروه‌ها هاتییە دیار کرن کو ل سەر دۆستانی و پێوەندییا بەردەوام یا ناڤبەرا هەڤپەیمانان و هێزێن پێشمەرگە هاتییە ئاخافتن و تەکەزی ل سەر بەردەوامی و بهێزکرنا پێوەندییان هاتییە کرن.
