ئێڤارا رۆژا یەکشەمێ 21/11/2021ێ، رێخستنا جوانێن شۆرەشگەر یا گرێدایی پەیەدێ سێ کەچێن تەمەن بچووک ژ باژارێ عاموودێ رەڤاندن ب ئارمانجا تەڤلیکرنا وان د ناڤا میلیشیایێن خوەیێن لەشکەری دا.
ناڤێن سێ کەچێن کوردێن تەمەن بچووک:
ئاڤین جەلال خەلیل (15 سالی)
ئایانا ئدریس ئیبراھیم (15 سالی)
ھەدیا عەبدلرەحمان عەنتەر (16 سالی)
بەریا چەند سالان، ڤێ رێخستنێ ب سەدان زارۆکێن تەمەن بچووک رەڤاندن و برن لەشکەریێ و ژ دەستپێکا ئیسال ڤە ھەژمارا ڤان تاوانان زێدە بوویە. وان دبەن ناڤا چەکداران دا و 6 مەھان دەورەیا پەروەردا لەشکەری دەرباس دکەن و د ڤێ ھەیامێ دا ب چ ئاوایی نکارن پەیوەندیێ ب مالباتێن خوە بکەن.
ل سەر ڤێ مژارێ ئەنجوومەنا نشتمانی یا کوردی (ئەنەکەسێ) داخویانیەک بەلاڤ کر و تیدا ئەڤ کارێ چەکدارێن سەر ب پەکەکێ ڤە ب توندی شەرمەزار کر.
ئەنجوومەنا نشتمانی یا کوردی (ئەنەکەسێ) ب توندی تاوان و بنپێکرنێن ڤێ رێخستنێ ل دژی گەلێ مە شەرمەزار دکەت، نەمازە د دەربارێ رەڤاندن و لەشکەرکرنا زارۆکێن تەمەن بچووک دا، ئەنەکەسە ھێزێن سووریا دەمۆکراتیک (ھەسەدێ) ب تەمامی بەرپرسیار دبینیت. ژ بۆ نەھشتنا ڤان تاوانا، بەرپرسیاریا بەرپرسیارانە کو ڤێ ھێزێ ھەلوەشینیت. ب تایبەتی ژ بەر کو ئۆفیسا “پاراستنا زارۆکان” کو ژ ئالیێ “ھەسەدێ” ڤە ھاتیە ئاڤاکرن، نکاریت زارۆکێن رەڤاندی ل مالباتێن وان ڤەگەرینیت.
ھێژایی گۆتنێیە کو دەستوورا دادگەھا تاوانان یا ناڤدەولەتی پشتراست دکەت کو “چەکدارکرنا زارۆکان یا نەچاری یان ب دلخوازی”د ناڤ ھێز یان کۆمێن چەکدار دا تاوانا شەری یە د پەڤچوونێن چەکداری یێن ناڤنەتەوەیی و ناڤدەولەتی دا.
ئەنجوومەنا نشتمانی یا کوردی ھەروھا داخواز ژ نەتەوێن یەکگرتی، رێخستنێن مافێن مرۆڤ و مرۆڤییێن پێوەندیدار ب پاراستنا مافێن زارۆکان، و ھێزێن ھەڤپەیمانیا ناڤدەولەتی دکەت کو ئەرکێن خوە ب جھ بینن و فشارێ ل سەر “ھەسەدێ” بکن دا کو ب دەھان زارۆکێن بچووکێن کو ژ ئالیێ چەکدارێن جوانێن شۆرەشگەر ڤە ھاتنە رەڤاندن، ڤەگەرینن. ڤێ رێخستنێ و میلیشیایێن وێ و لەشکەرکرنا زارۆکان ب ئاوایەکی دایمی راوەستینیت و مافێن وان ل گۆری یاسا و پەیمانێن ناڤنەتەوەیی بهێنە دەستنیشانکرن و گارانتیکرن.
