سەرۆکوەزیرێ هەرێما کوردستانێ، مەسروور بارزانی د پەیامەکێ دا راگه‌هاند، «ئەڤ چەندین جارە مە هشیاری دەربارێ مەترسیێن تەرۆریستێن داعشێ و خوەبرێکخستنا وان ب تایبەت ل ناڤچەیێن کوردستانی یێن ل دەرڤەیی ئیدارەیا هەرێما کوردستانێ دانە کو سوودێ ژ ڤالاهییا ئەولەکاریێ یا ل وێ هەرێمێ هەیە دبینن».
چەکدارێن داعشێ درەنەگی شەڤا بووری هێرشی سەر سەنگەرێن پێشمەرگە ل گوندێ کولەجۆ یێ ل گەرمیانێ کر، پێشمەرگەیان رووبروویی چەکداران بوون و هێرشا وان شکاند، لێ بەلێ د ئەنجاما تەقینا بۆمبەیەکێ ب هه‌مه‌ره‌كا پێشمەرگەی ڤه، 5 پێشمەرگە شەهید بوون.
سەرۆکوەزیر مەسروور بارزانی د وێ دەربارێ دا پەیامەک بەلاڤ کر و تێدا گۆت: «نووچەیا شەهیدبوونا هەژمارەک ژ پێشمەرگەیێن قەهرەمان شەڤا بووری ل سنۆرێ کولاجۆ کو ل دەما د هاوارهاتنا هەڤسەنگەرێن خوە دا شەهید بوون، گەلەک خەمگین کرم، هەڤخەمییا خوە ئاراستەیی مالبات و کەسوکارێن وان دکه‌م و داخواز ژ خودایێ مەزن دکه‌م، گیانێ وان ب به‌هه‌شتێ شاد بکەت و هێڤییا باشبوونا زوو ژی بۆ برینداران دخوازم».
سەرۆکوەزیر مەسروور بارزانی تەکەز دکەت، «ئەڤه چەندین جارە مە هشیاری دەربارێ مەترسیێن تەرۆریستێن داعشێ و خوەبرێکخستنا وان ب تایبەت ل ناڤچەیێن کوردستانی یێن ل دەرڤەیی ئیدارەیا هەرێما کوردستانێ دانە کو سوودێ ژ ڤالاهییا ئەولەکاریێ یا ل وێ هەرێمێ هەیە دبینن و بووینە مەترسییەکا جددی ل سەر ئەولەهی و خەلکێ وێ هەرێمێ، ژ بەر وێ، پێویستە بلەز ناڤەندێن ئەولەهیێ یێن هەڤبەشێن د ناڤبەرا هێزێن پێشمەرگە و ئارتێشا ئیراقێ ب هەماهەنگییا هێزێن هەڤپەیمانییا ناڤدەولەتی یا ل دژی داعشێ بێن ئاکتیڤکرن، ژ بۆ كو ڤالاهییا ئەولەهیێ یا ل وێ هەرێمێ هەیە، بهێته داگرتن، ژ بۆ ڤێ مەبەستێ ژی، مە وەزارەتا پێشمەرگە راسپاردییە ئامادەکاریێن زێدەتر بکه‌ن و رێکارێن پێویست بگرن ژ بۆ سنۆردارکرن و نەهشتنا گەفێن تەرۆریستێن داعشێ و رێگرتن ل گه‌هاندنا زیانێ ب هێزێن پێشمەرگەی و خەلکێ هەرێمێ».
