ب ده‌هان كه‌سوكار ژ مالباتێن زارۆكێن كورد یێن كو ژ هێلا رێخستنا په‌كه‌كێ و باسكێ وێ یێ رۆژئاڤا ڤه ل رۆژێن رابووری هاتنه ره‌ڤاندن، ئیرۆ ل همبه‌ری باره‌گه‌ها نه‌ته‌وه‌یێن یه‌كبوویی خوه‌پێشاندان كر.
ئیرۆ رۆژا یه‌كشه‌می 28/11/2021ێ، ب ده‌هان كه‌س ژ مالباتێن زارۆكێن كو دڤێ مه‌هێ دا ژ هێلا رێخستنا «جوانێن شۆره‌شگه‌ر» یا گرێدای په‌كه‌كێ ڤه هاتنه ره‌ڤاندن، ل همبه‌ری باره‌گه‌ها نه‌ته‌وه‌یێن یه‌كبوویی ل قامشلۆ كۆمبوون و نه‌رازیبوونا خوه ژ ته‌وانێن په‌كه‌كێ، یێن د راستا زارۆكێن كوردان دا دیار كرن.
مالباتێن زارۆكێن ره‌ڤاندی، بانگ ل نه‌ته‌وه‌یێن یه‌كبوویی كر كو ب ئه‌ركا خوه رابیت و رێ ل به‌ر له‌شكه‌ركرنا ب زۆر یا زارۆكان بگریت.
رێخستنا «جوانێن شۆره‌شگه‌ر» كو راسته‌ر راست ژ هێلا جه‌میل باییك ڤه تێ برێڤه برن، ته‌نێ د مه‌ها 11 یا ئیسالێ دا، پێتری 10 زارۆكان ژ كه‌چ و كۆڕێن قامشلۆ، عه‌فرینێ، عاموودێ و دێركێ ره‌ڤاندنه و چاره‌نڤیسا وان نه‌دیاره، مالباتێن هنه‌ك ژ وان زارۆكان گۆتنه كو رێخستنا «جوانێن شۆره‌شگه‌ر» ژ بۆ هه‌سه‌دێ ئه‌ڤ زارۆك ره‌ڤاندنه و ژ بۆ له‌شكه‌ر كرنا ب زۆر هاتنه برن.
رێخستنا په‌كه‌كێ ژ بۆ چێكرنا شه‌رڤانان پشتبه‌ستنێ ل سه‌ر ره‌ڤاندنا زارۆكێن كوردان ژ هه‌ر چار پارچه‌یێن كوردستانێ دكه‌ت، ئه‌ڤ یێك ژی ژ هێلا رێخستنێن ناڤده‌وله‌تی و رێخستنێن مافێن مرۆڤان ڤه هاتییه ته‌سبیت كرن.
