کۆنسولخانەیا گشتی یا فرانسایێ یا ل ھەولێرێ پەیامەکا سەرساخیێ پێشکەشی کاسووکار و مالباتێن پێنج شەھیدێن پێشمەرگەیێن ل کولەجۆ کر.
د پەیامێ دا ھات گۆتن: “کۆنسولخانەیا گشتی یا فرانسایێ یا ل ھەولێرێ سەرساخی ئاراستەیی مالباتێن وان پێنج پێشمەرگەیان دکەت، کو دوھی ب شەڤ ل کولەجۆ د رووبرووبوونا داعشێ دا شەھید بوون. کۆنسولخانە ھەڤسۆزیا خوە ژ بۆ ھەڤالێن وان یێن بریندار نیشان ددەت.”
د بەشەکا دی یا پەیاما ل سەر تویتەرێ دا ب زمانێ کوردی ھاتیە گۆتن: “شەرێ دژی داعشێ شەرێ مەیێ ھەڤبەشە، ئەم رژدین ل سەر بەردەوامکرنا ڤی شەری مل ب ملێ پێشمەرگەیان، ھێزێن ئەولەھیا ئیراقێ و ھەڤبەشێن مەیێن ل ھەڤپەیمانیێ.”
ھێژایی ببیرخستنێیە، شەڤا بۆری د ئەنجاما ئێریشەکا داعشێ دا و تەقینا بۆمبەیەکا ڤەدایی ل سەر رێیا کاروانێ ھێزێن پێشمەرگە ل گوندێ کولەجۆیێ ل سینۆرێ گەرمیانێ، پێنج پێشمەرگە شەھید بوون و 4 ژی بریندار بوون.
