چەکدارێن ئۆپۆزسیۆنا سووریێ یێن سه‌ر ب ئارتێشا ترکیێ ڤه كو هەرێما عه‌فرینێ داگیر کرنە، 5 کەسێن سڤیل رەڤاندن.
رێخستنا مافێن مرۆڤان ل عه‌فرینێ بەلاڤ کر، گرووپا چەکدار یا ب ناڤێ «پۆلیسا مەدەنی» رۆژا 28/11/2021ێ، ب سەر گوندێ قۆتا یێ سەر ب ناڤچەیا بلبلێ دا گرتن و هەژمارەک مالێن گوند و پشکنین کرن.
دیار کر ژی، چەکداران دو وەلاتیێن ب ناڤێ عەبدولحەنان جه‌عفەر و مستەفا سیدۆ ب تۆمەتا کو پێوەندییا وان ب رێڤەبەرییا خوەسەر ڤه هەبوو رەڤاندن.
وێ رێخستنێ راگه‌هاند ژی، چەکدارێن گرووپا «ئەل-حەمزات» ژی ل رۆژا 25/11/2021ێ کەسەکی ب ناڤێ عۆمەر حەیدەر رەشید ل سەر رێبەندا گوندێ کۆکانێ رەڤاندن و هەتا نها چارەنڤیسا وی نەدیارە.
دا زانین، چەکدارێن ل سەر رێبەندا تاخا مەحموودیێ یا عه‌فرینێ، هه‌ر ل هه‌مان رۆژێ کەسەکی ب ناڤێ عەبدین رەشید و دییا وی ئەمینە رەڤاندن و بەر ب جهەکێ نەدیار ڤە برن.
رێخستنا مافێن مرۆڤان ل عه‌فرینێ دبێژە، گرووپێن چەکداران ب ئارمانجا ستاندنا پەرە، فدیە و باجان ژ کوردێن عه‌فرینێ، وان هەموویان ب پێوەندییا ب رێڤەبەرییا خوەسەر تۆمەتبار دکه‌ن.
بەری دو رۆژان ئەنجوومەنا نشتمانی یا کوردی ل سووریێ ئه‌نه‌كه‌سێ د داخویانیەکێ دا رەڤاندنا وەلاتیێن عه‌فرینێ ژ ئالیێ گرووپێن چەکدارێن سەر ب ترکیێ ڤە ب توندی شەرمەزار کر.
ئەنه‌که‌سێ بانگ ل رێخستنێن مافێن مرۆڤان، جڤاکا ناڤدەولەتی و دەولەتا ترکیێ کر ژی، ڤان کریارێن چەکداران راوەستینن، ژ بەر کو دبنه سەدەما کۆچکرنا خەلکێ و بجهکرنا پلانا گوهارتنا دەمۆگرافییا هەرێمێ.
