“ئەم ئێریشێن تەرۆرستی ل دژێ پێشمەرگەیێن کوردستانێ شەرمەزار دکەین”

"ئەم ئێریشێن تەرۆرستی ل دژێ پێشمەرگەیێن کوردستانێ شەرمەزار دکەین"

سەرۆکێ پارتیا دەمۆکراتا کورد رەشید ئاکنج، د دەربارێ ئێریشا داعشێ یا ل مەخموورێ کو تێ دا 10 پێشمەرگە و 3 وەلاتیێن سڤیل شەھید بووبوون داخویانیەک بەلاڤ کر. ئاکنج د داخوویانیا خوە دا دبێژیت کو بەرگریا خاکا کوردستانا ئازاد ئەرکێ ھەر کوردەک وەلاتپارێزە و پیدڤییە کورد ھەموو ڤێ خاکا پیرۆز بپارێزن.

د بەردەوامیا داخویانیا خوە دا ئاکنج دبێژیت: ئێریشێن رێخستنا تەرۆرستی یا داعشێ د ڤان دەمێن داوی دا ل باشوورێ کوردستانێ ل ھەرێمێن دەرڤەیێ دەستھلاتداریا حکوومەتا ھەرێمێ دا، ژ بەر سیاسەت و ھەلوەستا حکوومەتا ئیراقێ زێدە بوونە. ل ڤان دەڤەران خەلک ب ئاوایێن پێوست نایێن پاراستن. ل ڤان ھەرێمان ڤالاھیەک پەیدا بوویە و داعش مفا ژ ڤێ یەکێ وەردگریت و ئێریشێ پێشمەرگە و ھەموەلاتیێن سڤیل دکەت. ژ بۆ ڤێ گەرەک حکوومەتا ئیراقێ دەملدەست ل گەل حکوومەتا ھەرێما کوردستانێ پەیمانێن خوە بینن جھ و حکوومەتا ھەرێمێ ژی ژ بۆ جێبەجێکرنا مادەیا 140 ھەولێن خوە زێدە بکەت.

سەرۆکێ پارتیا دەمۆکراتا کورد دبێژیت: ئەم ڤێ ئێریشا تەرۆرستی ل دژێ پێشمەرگەیێن کوردستانێ و خەلکێ سڤیل ب توندی شەرمەزار دکەین و ژ بۆ شەرێ ل دژێ داعشێ ب ھەموو ئاویێ پشتگریا خوە ژ بۆ حکوومەتا ھەرێمێ ددەین دیارکرن.