بارزانی بۆ رەڤەندا کوردی: دڤێت جیھان بزانیت کو کوردستان لاندکا پێکڤەژیانێ یە

بارزانی بۆ رەڤەندا کوردی: دڤێت جیھان بزانیت کو کوردستان لاندکا پێکڤەژیانێ یە

سەرۆک مەسوود بارزانی بەشداری کۆنفەرانسا رەڤەندا کوردی ل ھەولێرێ بوو و د گۆتارەکێ دا راگھاند، “ھەر دەم ئەم شانازیێ ب فەرھەنگا پێکڤەژیانێ دکەین، ئەڤ چاندە گەلەکا کەڤنە و دڤێت بهێتە پاراستن، دڤێت جیھان ژی بزانەیت کو کوردستان لاندکا پێکڤەژیانێ یە.”

سەرۆک مەسعوود بارزانی گۆتارەک د کۆنفەرانسا رەڤەندا کوردی ل ھەولێرێ دا پێشکێش کر و راگھاند، “ئەندامێن کۆنگرەیێ، ئەز پیرۆزباھیا گەرم ل وە دکەم کو وە بریار دا ل پایتەختا کوردستانێ ل ھەولێرا دژمنبەزین کۆنگرەیا خوە گرێ بدەن. ھێڤیدارم کۆنگرەیا وە سەرکەفتی بیت و بگھیتە ئارمانجێن خوە.”

دیار کر ژی: “ئارمانج ئەوە، رەڤەندا کوردی ل دەرڤە بهێتە برکخستنکرن، ئەرکێن وێ بێن دیارکرن و ھەموو ب ھەڤ را ھەول بدەن خزمەتا گەلێ خوە بکەن. ئەم رەڤەندا کوردی ل دەرڤە ب سامانەکا نەتەوەیی یا گەلەک گرینگ دزانین. ھوون دکارن رۆلەکێ مەزن د پشتەڤانیکرنا ل ملەتێ خوە بگێرن. ھوون دکارن خوە برێک بێخن و لۆبیەکا بھێز ئاڤا بکەن و د ھەموو واران دا رۆلەکێ سەرەکی ژ بۆ دۆزا گەلێ خوەیێ رەوا ببینن.”

سەرۆک بارزانی دیار کر: “ئەم داخوازکارین، دۆزا گەلێ کورد ل ھەر پارچەیەکێ ب ئاوایەکی ئاشتی و دەمۆکراسی بهێتە چارەسەرکرن. شەر ژ بۆ چارەسەرکرنا پرسگرێکێن گەلێ مە و ھەر پرسگرێکەکا دی، نە چارەرسەرییە.”

دەستنیشان کر: “ئەم وەکە کورد دڤێت بالدار بین کو نابیت ناکۆکیێن لگەل رەژیمان دا، ببنە ناکۆکیێن د ناڤبەرا گەلان دا.” گۆت ژی: “کوردستان نموونەیەکا جوان ژ بۆ پێکڤەژیانا ئۆلی و نەتەوی یە. ھەر دەم ئەم شانازیێ ب ڤێ فەرھەنگێ دکەین کو ئەڤ چاندە گەلەکا کەڤنە و دڤێت بهێتە پاراستن، دڤێت جیھانی ژی بزانیت کو کوردستان لاندکا پێکڤەژیانێ یە.”

سەرۆک مەسوود بارزانی د گۆتارا خوە دا تەکەز کر: “ئەم ژ بۆ پاراستنا پێکھاتەیان و مافێن وان بەردەوام دبین”.

ھەروھا گۆت: “پێویستە رەڤەندا کوردی کارەکێ جدی ژ بۆ خوەبرێکخستن و کۆمکرنا دلسۆزان و وەلاتپارێزان د بن سیبەرا ئالایێ کوردستانێ دا بکەت. رێزێ ل یاسایێن وەلاتێن کو تێ دا دژین بگرن و خوە دووری کارێن نەیاسایی بکەن. جوانان ل سەر خوەندن و پەروەردەیێ ھان بدەن و زمان و کولتورا گەلێ خوە ژ بیر نەکەن و پەیوەندیێن دۆستانە ب ھەموو رەڤەندێن نەتەوێن دی یێن ل وەلاتان دژین بکەن.”

سەرۆک بارزانی گۆت: “ھەولێن جدی بدەن و دۆستێن زێدەتر ژ بۆ گەلێ کوردستانێ دروست بکەن، ژ بۆ ئەو پشتەڤانیێ ل ناساندنا جینۆساید و ھەموو تاوانێن کو ل دژی گەلێ کوردستانێ ھاتنە کرن بکەن. پێویستە پارلامەنتۆ و خەلکێ وان وەلاتان فشارێ ل وەلاتێن خوە بکەن، ژ بۆ کو ئەو مافێن گەلێ کوردستانێ ناس بکەن. ھەتا نھا گەلەک ھەول ھاتنە دایین، لێ ئەو ھەول وەک پێویست نەبوونە. دڤێت ژ نھا و پێ ڤە خەلک و پارلامەتۆیێن وان وەلاتان ھەڤکار بن.”

سەرۆک بارزانی دەربارێ ئێریشا پێر یا داعشێ ل مەخموورێ دا راگھاند: “مخابن هێژ مەترسیێن مەزن ل سەر ئەزموونا ھەرێما کوردستانێ ھەنە. مخابن بەری چەند رۆژان ل گەرمیانێ و دوھی ژی ل مەخموورێ تەرۆرستان چەند وەلاتی و پێشمەرگە شەھید کرن. ئەڤ ژی وێ راستیێ نیشان ددەت کو مەترسیا مەزن ل سەر ھەرێما کوردستانێ ھەیە. ژ ڤر ڤە ئەز ھەموو خەلکێ کوردستانێ پشتراست دکەم، خوینا شەھیدان ڤالا ناچیت و ئەم دێ تۆلا شەھیدێن خوە ڤەکەین.”