ل گوندێ قەرە سالم ل دەڤەرا شێخ بزێنی ل کەرکووکێ چەکدارێن داعشێ شەڤا بۆری ئێریشی سەر ھێزێن پێشمەرگە کر، پێشمەرگە رووبرووبوویی ئێریشێ بوون و ئەنجامێ دا شەھید و بریندار ھەنە.
ل گۆر زانیاریان، ھێزا پێشمەرگە رووبروویی ئێریشا داعشێ بوون و د ناڤبەرا وان دا شەر و پەڤچوون دەرکەت.
د وێ دەربارێ دا وەزارەتا پێشمەرگە داخویانیەک بەلاڤ کر و تێ دا راگھاند، شەڤا 5/6 بەرفانبارێ تەرۆرستێن داعشێ ئێریشی سەر ھێزێن پێشمەرگە ل نێزیکی گوندێ قەرە سالم کرن.
ل گۆر داخویانیا وەزارەتا پێشمەرگە، د ئەنجاما ئێریشا ترسۆنەک دا شەھید و بریندار د ناڤا رێزێن پێشمەرگە دا ھەنە.
دیار کر ژی، ھێزێن پێشمەرگە بەرسڤا تەرۆریستان دان، تەرۆرست رەڤیان و نھا رەوش د بن کۆنترۆلا پێشمەرگە دایە.
ل گۆری زانیاریان، شەڤا بۆری دو پێشمەرگە شەھید بوون و 4 ژی بریندار بوون لێ ئیرۆ دانێ سپێدێ دو پێشمەرگەیێن بریندار شەھید بوون و ھەژمارا شەھیدێن ئێرشا شەڤا بۆری گەھشت 4 کەسان.
ناڤێ وان پێشمەرگەیێن کو شەھید بوونە، وەھا نە:
شەھید نەقیب مەسعوود تەلعەت، خەلکێ ناحیا سێگردکان
شەھید نەھرۆ ناجی، خەلکێ ناحیا دارەتوویا ھەولێرێ
شەھید ھەژار جەلال، خەلکێ کەرکووکێ
شەھید رێکان تۆفیق، خەلکێ گوندێ مام زاوایێ ھەولێرێ
