هه‌سه‌ده دێ بیته به‌شه‌ك ژ ئارتێشا ره‌ژیما سووریێ
بریار هاتییه گرتن كو هێزێن سووریایا ده‌مۆكراتیك هه‌سه‌ده، ببه به‌شه‌ك ژ ئارتێشا ره‌ژیما سووریێ، ئه‌ڤ بڕیار د جڤینا رۆژێن رابووری یا نێڤبه‌را په‌یه‌دێ، نوونه‌رێن رووسیا و ره‌ژیما سووریێ دا چێبوویه.
چاڤكانیێن پێگه‌ها «داركا مازی» ل رۆژئاڤا كوردستانێ ئه‌شكه‌ره كرنه، د جڤینا رۆژا 2 دیسامبه‌را 2021ێ ده، ل باژارێ قامشلۆ یا رۆژئاڤا كوردستانێ، جڤینه‌ك ل نێڤبه‌را په‌یه‌دێ، ره‌ژیما سووریێ و رووسیایێ ده هات ل دارخستن، خه‌ته‌ریێن ل سه‌ر باكور و رۆژهلاتا سووریێ (ناڤچه‌یێن ژێر ده‌ستهلاتا رێڤه‌به‌رییا خوه‌سه‌ر یا په‌كه‌كێ)، هه‌روه‌ها چاره‌نڤیسا هێزێن سووریایا ده‌مۆكراتیك هه‌سه‌دێ، باسكێ له‌شكری یێ په‌یه‌دێ، مژارێن نیقاشێ یێن ڤێ جڤینێ بوون.
ل گۆری ئاگاهیێن ده‌ستێ مه، د وێ جڤینێ ده ل سه‌ر داخوازی و حه‌زا رێڤه‌به‌رییا په‌یه‌دێ باسكێ په‌كه‌كێ یێ رۆژئاڤا كوردستانێ و رێڤه‌به‌رییا ب ناڤێ «رێڤه‌به‌رییا خوه‌سه‌ر»، هێزێن هه‌سه‌دێ وێ ببن به‌شه‌ك ژ ئارتێشا ره‌ژیما سووریێ.
د جڤینا 2 دیسامبه‌رێ ده، بریار ب رازیبوونا سێ ئالییان هاتییه گرتن، لێ به‌لێ پێڤاژۆ و مه‌كانیزما ته‌ڤلیكرنا هه‌سه‌دێ د یه‌كه‌یێن ئارتێشا سووریێ ده، ژ بۆی جڤینێن رۆژێن پێش مه هشتنه.
ته‌ڤگه‌را كو هه‌سه‌ده ب ئارتێشا به‌شار ره ببه یه‌ك ل چ ده‌مه‌كێ ده‌ستپێكربوو؟
رێڤه‌به‌رییا رۆژئاڤا كوردستانێ كو ب «رێڤه‌به‌رییا خوه‌سه‌ر» تێ ناس كرن، تام ل ژێر باندۆرا رێخستنا په‌كه‌كێ یه و ب ته‌علیماتێن قه‌ندیلێ ته‌ڤ دگه‌ره، ل مه‌ها نۆڤێمبه‌را سالا 2019ێ بۆ یه‌كه‌م جار هه‌ولێن وێ ژ بۆی ته‌ڤلیكرنا هه‌سه‌دێ بۆ ناڤا ئارتێشا ره‌ژیما سووریێ ده‌ستپێكرن.
ئیلهام ئه‌حمه‌د هه‌ڤسه‌رۆكا مه‌جلسا جیبجیكار ئا سووریایا ده‌مۆكراتیك مه‌سه‌دێ، باسكێ سیاسی یێ هه‌سه‌دێ، ل رۆژا 1 نۆڤێمبه‌را سالا 2019ێ ژ ئاژانسا «سپۆتنیك» یا رووسیایێ گۆتبوو: «كو هه‌سه‌ده ببه به‌شه‌ك ژ ئارتێشا سووریێ د رۆژه‌ڤا مه ده هه‌یه، لێ به‌لێ ئه‌ز نابێژم ئه‌ڤ یێك وێ د ساعه‌ته‌كێ ده، یان د رۆژه‌كێ ده پێك وه‌ره، ئه‌ز دبێژم ئه‌م دكارن نیقاشێ ل سه‌ر ڤێ مه‌سه‌لێ بكن».
پێشی ڤان داخویانیێن ئیلهام ئه‌حمه‌د، وه‌زاره‌تا به‌ره‌ڤانیێ یا سووریێ بانگ ل هه‌سه‌دێ كر ته‌ڤلی ئارتێشا سووریێ ببن و گۆت كو ئه‌و ئاماده‌نه وان د ناڤا خوه ده قه‌بوول بكن.
پاش ڤان هه‌ولێن رێڤه‌به‌رییا خوه‌سه‌ر و بانگا وه‌زاره‌تا به‌ره‌ڤانیێ یا سووریێ، یه‌كه‌یێن ئارتێشا سووریێ ب رازیبوونا هه‌سه‌دێ و ل ژێر چاڤدێرییا رووسیایێ، كه‌تن د هنه‌ك ناڤچه‌یێن رۆژئاڤا كوردستانێ ده، ئه‌ڤ یێك ل 9 ئۆكتۆبه‌را 2019ێ پێكهاتبوو.
جه‌میل باییك سه‌رپه‌رشتییا پرسا ته‌ڤلیبوونێ دكه
چاڤكانیێن پێگه‌ها «داركا مازی» ده‌ست نیشان كرنه، رێڤه‌به‌رییا پارتییا یه‌كێتییا ده‌مۆكراتیك په‌یه‌دێ و رێڤه‌به‌رییا خوه‌سه‌ر، ژ مه‌ها ئۆكتۆبه‌را ئیسال 2021ێ ب فه‌رمان و ته‌علیماتێن قه‌ندیلێ، هه‌ولێن چێكرنا جڤینا ل گه‌ل ره‌ژیما سووریێ ده‌ست پێ كرنه، ئه‌ڤ جڤین ژی ل رۆژا 2 دیسامبه‌رێ پێكهات.
چاڤدێرێن سیایێ و یێن كو ره‌وشا رۆژئاڤا كوردستانێ د شۆپینن، ره‌خنه‌یێن هه‌ری دژوار ل جه‌میل باییك گرتن و ئه‌ڤ داخۆیانی وه‌كه ڤه‌گه‌رینا ژ بۆی باوه‌شا ره‌ژیمێ ئانالیزه كرن.
رێخستنا په‌كه‌كێ، ئه‌ڤ 43 ساله ب ڤێ سیاسه‌تا خوه یا شاش گه‌لێ كورد دخاپینه، د جه‌وهه‌ر ده ئه‌و ژ بۆی به‌رژه‌وه‌ندییا ده‌وله‌تێن داگیركه‌ر ته‌ڤ دگه‌ره، عه‌ینی ته‌جروبه ل رۆژئاڤا كوردستانێ ته‌ست كر و پاش 11 هه‌زار شه‌هیدان ژ كه‌چ و جوانێن رۆژئاڤا جار دن بریار گرت كو ئه‌و ڤه‌گه‌ره باوه‌شا به‌شار ئه‌سه‌د و رۆژئاڤا كوردستانێ جاره‌كه دن بكه به‌شه‌ك ژ وێ ره‌ژیما كو هێژان ل سه‌ر ئینكارا كوردان موكره.
