شاندەکێ پێشمەرگەی ژ بۆ گۆتوبێژکرنا رووبرووبوونا داعشێ ل به‌غدایێ یە

peshmarga-iraq-army

شاندەکا وەزارەتا پێشمەرگە بەر ب به‌غدایێ ڤە ب رێ کەتییه‌ و دو جڤینێن گرنگ دەربارێ شەرێ ل دژی داعشێ دێ دگه‌ل وەزارەتا بەرەڤانیێ یا ئیراقێ ئه‌نجام ده‌ت.

وەزارەتا پێشمەرگە د داخویانیەکێ دا راگه‌هاند، ئیرۆ 7/12/2021ێ شاندەکێ بلند یێ وەزارەتا پێشمەرگە ب سەرۆکاتییا ئەمیندارێ گشتییێ وەزارەتێ جەبار یاوەر بەر ب به‌غدایێ ب رێ کەتییه‌.

دیار کر ژی، شاندا وەزارەتا پێشمەرگە دو جڤینێن جودا دکەت، یا یەکەم ب هەوالگیرییا بەرەڤانییا ئیراقێ و ل فەرماندارییا ئۆپەراسیۆنێن هەڤبەش تێ کرن.

دەستنیشان کر ژی، جڤینا دن ژی ل وەزارەتا بەرەڤانییا ئیراقێ یه‌، ژ بۆ گوفتوگۆکرنا ل سەر رەوشا نها یا ناڤچەیێ، گەفێن تەرۆریستان، پێنگاڤێن دەربارێ چارەسەر کرنا پرسگرێکێن د ناڤبەرا ئارتێشا ئیراقێ و پێشمەرگەی دا، ژ بۆ كو ب هەڤرا دووڤ داعشێ بچن.

داخویانییا وەزارەتا پێشمەرگە ئاماژە ب وێ دا، جڤینەک د ناڤبەرا ئەمیندارێ گشتیێ وەزارەتا پێشمەرگە و ئەمیندارییا گشتی یا بەرەڤانییا ئیراقێ ژی تێ کرن.

دا زانین ژی، «جڤینێن د ناڤبەرا شاندا پێشمەرگە و بەرەڤانییا ئیراقێ دا بەردەوامن و هەر دو ئالی ب ئارمانجا ژناڤبرنا تەرۆریستان و داگرتنا ناڤچەیێن کو ڤالاهییا ئەولەهیێ لێ هەیە، د گوفتگوویان دا نە، ئەنجامدانا ئۆپەراسیۆنێن هەڤبەش د ناڤبەرا پێشمەرگە و ئارتێشێ دا، ژ کارێن پێشینەیێن وان گوفتووگۆیانە».