هه‌سه‌دێ دانپێدان كر ئه‌و زارۆكان ب زۆری چه‌كدار دكه‌ن

zarok-pyd

ئۆفیسا پاراستنا زارۆکان سەر ب هێزێن سووریایا دەمۆکراتیک هه‌سه‌دێ ڤه‌، ل هەرێما فراتێ کو ناڤەندا وێ کۆبانیێ یە راگهاند، وان ژ دەستپێکا مژدارێ و هەتا نها 18 سكالا ل دەربارێ برنا زارۆکان بۆ چەکدارییا ب زۆر تۆمار کرنە.

هەڤسەرۆکێ ئۆفیسا پاراستنا زارۆکان ل هەرێما فراتێ فەتحی مەحموود رۆژا 6-12-2021ێ راگه‌هاندبوو، کو وان ژ دەستپێکا مژدارێ و هەتا نها 18 سكالا ل دەربارێ برنا زارۆکان ژ هەردو رەگەزان (نێر و مێ) بۆ چەکدارییا ب زۆر تۆمار کرنە.

هەروه‌ها فەتحی مەحموود ئەشکەرە کر کو وان هەتا نها تەنێ 3 زارۆک ژ وان 18 زارۆکان بۆ مالباتێن وان ڤەگەراندنە.

فەتحی مەحموود هەر دا زانین، کو د 2020ێ دا وان 36 سكالا ل دەربارێ برنا زارۆکان بۆ چەکداریێ تۆمارکربوون، لێ د 2021ێ دە وان 106 سكالا تۆمار کرنە، ژ وان ژی 62 زارۆک بۆ مالباتێن وان هاتنە ڤەگەراندن.