ئەنەکەسە: پیدڤییە بنپێکرنێن مافێن مرۆڤان یێن چەکداران و پەیەدێ بهێنە راوەستاندن

ئەنکس: پیدڤییە بنپێکرنێن مافێن مرۆڤان یێن چەکداران و پەیەدێ بهێنە راوەستاندن

ئەنەکەسێ د رۆژا جیھانی یا مافێن مرۆڤان دا بانگ ل نەتەوێن یەکگرتی و جڤاکا ناڤدەولەتی دکەت، بنپێکرنا ل عەفرین، سەرێ کانیێ و گرێ سپی راوەستینن و ژ پەیەدێ ژی داخواز دکەت گرتیێن سیاسی و زارۆکێن رەڤاندی سەربەست بەردەت.

ب هەلکەفتا رۆژا جیھانییا مافێ مۆرۆڤان، ئەنجوومەنا نشتمانییا کوردی ل سووریێ (ئەنەکەسێ) داخویانیەک وەشاند و تێ دا راگھاند، “گەلێ کورد کو د دیرۆکا خوە دا ل سەر دەستێ رەژیمێن دەولەتێن کوردستان پارچە کری راستی چەوساندنێن نەتەوی یێن ھۆڤانە ھاتنە و ژ مافێن خوەیێن نەتەوی و مرۆڤی یێن ھەری بنگەھین بێپار مانە و ل دژی وی شەرێن قرکرنێ ھاتن مەشاندن.”

ئەنەکەسێ دەستنیشان دکەت ژی، “ل سووریێ ژی، گەلێ سووریێ ب گشتی راستی زۆر و زولمێ ژ ئالیێ رەژیمێن ل پەی ھەڤ ھاتنە. د سالێن شۆرەشا سووریێ دا ژی، ھەموو پێکھاتەیێن نەتەوی و جڤاکی ل سەر دەستێ رەژیم و ھێزێن تەرۆرێ راستی زولم و زۆرداریێن زێدە ھاتن و پارا گەلێ کورد ژ ڤان زولم و زۆرداریێیا ھەری زێدە بوو.”

ئەنەکەسە د بەشەکا دی یا داخویانیا خوە دا دبێژیت: “خەلکێ عەفرین، سەرێ کانیێ و گرێ سپی ژی راستی بنپێکرنێن ھۆڤانە ل سەر دەستێ گرووپێن چەکداران تێن، وەک کوشتن، رەڤاندن، کۆچبەرکرن، دەستدانینا سەر مال و ملکێن وەلاتیان و پرۆسەیا گوھارتنا دەمۆگرافی.”

ھەروھا ئەنەکەسێ بانگ ل جڤاکا ناڤدەولەتی، نەتەوێن یەکگرتی، رێخستنێن مافێن مرۆڤان یێن پێوەندیدار و ترکیێ دکەت، ڤان بنپێکرنێن عەفرین، سەرێ کانیێ و گرێ سپی راوەستینن و چەکداران ژ ڤان باژاران دەرخن، ھەروھا ئالیکاریا وەلاتیان بکەن دا کو ڤەگەرن مال و ملکێن خوە و ئیدارەیا ڤان باژاران رادەستێ خەلکێ وان بکەت.

ھەروھا ئەنەکەسێ د داخویانیا خوە دا ئاماژە ب کریارێن پەیەدێ یێن وەکی رەڤاندن و بچەکرنا زارۆکان و گرتنا وەلاتیان و چالاکڤانێن سیاسی کر و داخواز ژ ڤێ پارتیێ کر، گرتی و زارۆکان سەربەست بەردەت.

ئەنەکەسە بانگ ل نەتەوێن یەکبوویی، رێخستنێن مافێن مرۆڤان و وەلاتێن پێوەندیدار دکەت کو کار بکەن ژ بۆ ئازادکرنا ب ھەزاران گرتیێن سووری د زیندان و گرتیگەھێن رەژیمێ دا.