فەرماندارێ یەنەکێ یێ نێزیک ژ پەکەکێ: ژ ناڤا پەکەکێ ب خوە زانیار دەربارێ وێ دا ژ بۆ ترکیێ دهێنە شاندن 

فەرماندارێ یەنەکێ یێ نێزیک ژ پەکەکێ: ژ ناڤا پەکەکێ ب خوە زانیار دەربارێ وێ دا ژ بۆ ترکیێ دهێنە شاندن 

فەرماندارەکێ پێشمەرگەیێن یەکیتیا نشتمانیا کوردستانێ (یەنەکێ)  قادر خۆرانی، ئاشکەرا کریە، ژ ناڤا پەکەکێ ب خوە سیخورێن سەر ب ئیستیخباراتا ترکیێ ھەنە. ھەروھا خۆرانی داخواز ژ پەکەکێ کر رەوشا ھەرێما کوردستانێ د بەر چاڤان را دەرباس بکەت.

پارتیا کارکەرێن کوردستانێ (پەکەکێ) ب بەردەوامی ئێریشی ھەرێما کوردستانێ دکەت و گەفا شەر ل ئالیێن جیاوازێ ھەرێما کوردستانێ دکەت. د ڤان دەمێن داویێ دا پەکەکێ فشارا خوە ب سەر یەنەکێ زێدەتر کریە و ھەول ددەت ب بەھانەیا خوەپێشاندانان و ئالۆزیان ساز بکەت و بارەگەھان بشەوتینیت.

فەرماندارێ یەنەکێ یی عەمید قادر خۆرانی راگھاندیە دڤێت سەرجەم ھەموو حزبێن پارچەیێن دی یێن کوردستانێ رەوش و پێگەھا یاسایی و دەستوورا و ئیدارییا ھەرێما کوردستانێ ل بەر چاڤان دەرباس بکەن و ئەگەر کوردستان تێک بچیت دێ ھەموو  تێک چن، ژ بەر وێ دڤێت پەکەکە و حزبێن دی ل ھەرێما کوردستانێ چالاکیێن خوە رابگرن.

ھەوھا عەمید قادر خۆرانی دبێژیت، “ھەرێما کوردستانێ بوویە ھێلین ژ بۆ ھەموویان و سەرۆکایەتییا ھەرێما کوردستانێ و سەرۆکوەزیریا ھەرێما کوردستانێ پشتەڤانیا بەشێن دی یێن کوردستانێ دکەن و د تەنگاسیان دا سەرۆکێ ھەرێما کوردستانێ و سەرۆکوەزیرێ ھەرێما کوردستانێ ب ھاوارا وان دا چوونە، خەلکێ باکور و رۆژئاڤایێ کوردستانێ د دەما کو ل وان دقەومیت بەرێ خوە ددەنە ھەرێما کوردستانێ، چونکە ب ئاوایەکێ ژ بەشێن دی یێن کوردستانێ ئارامترە. ژ بەر وێ دڤێ پشتەڤانیا ھەرێما کوردستانێ بکەن و ھەگەر ھەرێما کوردستانێ تێک بچیت ئەو دێ ھەموو ژی تێک چن.”

عەمید قادر خۆرانی ئاماژە ب وێ یەکێ ژی دکەت ھەر حزبەکا ژ بلی حزبێن کوردی بکەڤیتە ناڤا ھەرێما کوردستانێ، ھایا حکوومەتا ھەرێما کوردستانێ ژێ چێدبیت و دێ ئەنجاما وێ ژی خراب ببیت.

د بەردەوامیێ ژی دە عەمید قادر خۆرانی راگهاند: “ترکیا دەولەتەکا چالاکە ل ئیراقێ و ھەروھا ل سووریا و ئیرانێ ژی، ب تایبەت د وارێ ئیستیخباراتی دا، ژ بەر کو دەزگەھا ئیستیخباراتا ترکیێ ل ناڤا پەکەکێ ب خوە سیخووریا خوە ئاڤا کریە و ب وی ئاوایی ئیحتیمالە زانیاری ژ بۆ ترکیێ بچن ل سەر بارەگەھ و و بەشەک ل فەرماندارێن پەکەکێ و کار و چالاکیێن وێ.”