پارتیا دەمۆکراتا کوردستانێ (HDK) راگەھاند، وان 2 کەس گرتنە کو د ئێرشا مووشەکی یا ل دژی بارەگەھێ وان یێ ل کۆیێ دا ژ بۆ ئیرانێ سیخورتی کربوو.
رۆژا 8ێ ئیلۆنا سالا 2018ێ، ئیرانێ ب مووشەکان ئێریشی بارەگەھا سەرەکی یا HDK ل باژارێ کۆیە یێ ھەرێما کوردستانێ کربوو.
د وێ ئێرشێ دا 16 پێشمەرگەیێن رۆژھلاتی شەھید بووبوون و گەلەک ژی بریندار بووبوون. د ناڤ شەھیدان دا 6 ئەندامێن رێڤەبەریا وێ پارتیێ ھەبوون.
HDKێ د داخویانیەکێ دا راگەھاندیە، پشتی لێپرسین و لێکۆلینێن بەرفرەھ، وان 2 کەس گرتنە کو وەک پێشمەرگە خوە خستبوو ناڤ رێزێن وان، لێ د راستیێ دا سیخورێن ئیرانێ بوونە و ژ بۆ خرابکاری و تەرۆرکرنا ئەندام و سەرکردەیێن وان تەڤلی وێ پارتیێ بوونە.
HDKێ دا زانین ژی، وان سیخوران ل سەر ئێریشا مووشەکی یا 8 ئیلۆنا 2018ێ ئاگاھی دابوون پاسدارێن ئیرانێ و وان ژی بارەگەھا وان مووشەکباران کربوون.
د داخویانیا HDK دا ھاتیە گۆتن، وان سیخوران کو ناڤێ یەکی کەیوان (سۆران) و یێ دین فەیزی (فەراز سەلەواتی)یە و ھەر دو ژی خەلکێ باژارێ سنە نە، د لێپرسینێ دا ل سیخورتیا خوە موکر ھاتنە و ھەر تشت قەبوول کرینە.
HDKێ راگھاند ژی، ژ بەر کو ئەو تاوان ل ھەرێما کوردستانێ بوویە و وەک رێز ژ بۆ سەروەریا ھەرێما کوردستانێ ژی، وان ئەو ھەر دو تۆھمەتبار رادەستی دادوەریا ھەرێما کوردستانێ کرن.
