حه‌یده‌ر شه‌شۆ: ل هەر جهەکی دەستهه‌لاتا حه‌شدا شه‌عبی هەبە په‌كه‌كه لێ یە
فەرماندارێ هێزا ئێزدیخانێ حه‌یده‌ر شەشۆ رادگه‌هینیت، ل هەر جهەکی دەستهه‌لاتا حه‌شدا شه‌عبی هەبیت، په‌كه‌كه لێ وێرێ هه‌یه و هەڤکاری و هەماهەنگیێ د گه‌ل ئێك دكه‌ن.
حه‌یده‌ر شەشۆ ژ كوردستان 24ێ را راگه‌هاند، ژ سالا 2017ێ، هەر دەما حکوومەتا ئیراقێ خواستییە کو ئیدارەیا رەوا یا شنگالێ ڤەگەریت وی باژاری، گرووپ و میلیشیایێن چەکدار ل دژی وێ یەکێ دەردکەڤن، پشتەڤانییا په‌كه‌كێ دکن و ئالۆزییان دروست دکه‌ن.
گۆت ژی: «حه‌شدا شه‌عبی و په‌كه‌كه ئالۆزییان ل هەموو ناڤچەیێن کوردستانی یێن ل دەرڤەی ئیدارەیا هەرێما کوردستانێ چێدكه‌ن، په‌كه‌كه ل شنگالێ، مەخموور، کەرکووک و خانەقینێ ژی هەیە، ل هەر جهەکی دەستهه‌لاتا حه‌شدا شه‌عبی هەبیت، په‌كه‌كه ل وێرێ یه و هەڤکاری و هەماهەنگیێ ب هەڤ را دکه‌ن».
فەرماندارێ هێزا ئێزدیخانێ گۆت: «هەبوونا په‌كه‌كێ ل شنگالێ، ل دژی ئیرادەیا خەلکێ شنگالێ یە و هەموو ئالی ل هەمبەر دەرێخستنا په‌كه‌كێ ژ شنگالێ نە جددی نە، دخوازن شنگال وەک عەفرین و سەرێ کانیێ لێ بهێت».
دەستنیشان کر، دڤێت حکوومەتا ئیراقێ، حکوومەتا هەرێما کوردستانێ و هەموو ئالیێن ناڤدەولەتی، کارەساتا ب سەرێ خەلکێ شنگالێ هاتی، ل بەر چاڤ بگرن.
هەروه‌ها گۆت: «ب دیتنا مە، حکوومەتا ئیراقێ دشێت د هەیاما مەهەکێ دا په‌كه‌كێ ژ شنگالێ ده‌ربێخیت و دشێت ژی د مەهەکێ دا رێکكەفتنا شنگالێ جێبه‌جێ بکەت و خەلکێ شنگالێ قەرەبوو بکەت».
فەرماندارێ هێزا ئێزدیخانێ تەکەز کر: «شنگال پارچەیەکه ژ خاکا کوردستانێ، حکوومەتا هەرێما کوردستانێ ل همبه‌ری شنگالێ بەرپرسە و دڤێت لێ خودان ده‌ركه‌ڤیت، ژ بەر کو 70% پتر ژ خەلکێ شنگالێ دەنگێ خوە داینه لیستەیا کوردستانی و پارتییا دەمۆکراتا کوردستانێ».
