ل وانێ بەنداڤا زەرنەکێ یا ل سەر چەمێ خۆشابێ و بەنداڤا ساریمەهمەتێ یا ل سەر چەمێ قەرەسوویێ، ژ بەر داکەتنا ئاستا ئاڤێ ل بەر خەتەرەیا زهابوونێ نە.
ژ بەر کێمبوونا بارانێ و زێدەبوونا گەرماهیێ ئاڤا چەم، گۆل و کانیان کێم بوو ژ بەر ڤێ ئاستا ئاڤا بەنداڤان ژی گەلەک داکەت.
بەنداڤا زەرنەکێ یا د سالا 1988ێ دا ژ بۆ ئاڤدانێ هاتبوو ئاڤاکرن كو 105 ملیۆن م3 ئاستا وێ یا ئاڤێ یه، داکەت 22 ملیۆن م3.
بەنداڤا ساریمەمەتێ یا د سالا 1991ێ دا هاتبوو ئاڤاکرن و 196 ملیۆن م3 ئاستا وێ یا ئاڤێ یه، داکەت 30 ملیۆن م3.
ژ بەر هشکاتیێ ئاستا ئاڤا ڤان بەنداڤا داکەت ئاستا هەری کێما 5 سالێن داوین و ل بەنداڤان گراڤ دەرکەتن، روویێ ئەردێ ژی زوها بوویە.
گهلێ باكورێ كوردستانێ و وانێ ب هێڤی نه ب تایبهت ژ جۆتکار و ماسیگران کو د ڤان رۆژێ پێشییا مه دا ب تێرا خوە باران بباریت.