بەرپرسێ خالا سنۆری یا پێشابوورێ شەوکەت بەربوھاری داخویانییەک دەربارێ ئێریشا په‌كه‌كێ ل سەر پاسەوانێن وێ خالا سینۆری بەلاڤ کر و راگه‌ھاند، د ئەنجاما وێ ئێریشێ دا، ھەژمارەک ژ پاسەوانان بریندار بوون.
د بەشەکا وێ داخویانیێ دا ھاتییە: ئارمانجا په‌كه‌كێ ژ ڤی کاری، تەنێ دەرخستنا ئالۆزی، تەڤلھەڤی، خرابکرنا رەوشا ھەرێما کوردستانێ و رێگرتن ل بەرژەوەندیێن گەلێ کورد ل رۆژئاڤایێ کوردستانێ یە.
داخویانیا بەرپرسێ خالا سنۆری یێ پێشابوورێ:
ژ ھەیاما سێ مەھان ڤە یە ب بریارا په‌كه‌كێ دو کۆن ل خالا سنۆری سێمالکا یا د ناڤبەرا ھەرێما کوردستانێ و رۆژئاڤایێ کوردستانێ دا ھاتنە ڤەگرتن و رۆژانە ب نەچاری خەلک تێدا تێ کۆم کرن و وان ب بلندکرنا ئالا و سەمبۆلێن په‌كه‌كێ و ب ئاڤێتنا دروشمان ل دژی ھەرێما کوردستانێ ھان دده‌ن.
تەڤی ھەموو شەرفرۆتنا په‌كه‌كێ، لێ بەلێ ژ بەر بەرژەوەندییا گشتی و بەرچاڤگرتنا رەوشا خەلکێ خوەشەویستێ رۆژئاڤا، مە خوە گرتییە و چ کارڤەدان نیشان نەدایە.
لێ مخابن رۆژا چارشەمبێ 15\12\2021ێ په‌كه‌كێ زێدەتر ژ 100 کەسان و ل بەر چاڤێ خەلکێ و ئاساییشا سێمالکا، ئێریش بەر ب خالا مە پێشابوورێ ئینا، د ئەنجاما وێ ئێریشێ دا، ھەژمارەک ژ پاسەوانان ب گرانی بریندار بوون و جامێن ئۆتۆمۆبیلا ئاگرکوژێیا خالا سنۆری شکاندن.
ئارمانجا په‌كه‌كێ ژ ڤی کاری، تەنێ دەرخستنا ئالۆزی، تەڤلھەڤی، خرابکرنا رەوشا ھەرێما کوردستانێ و رێگرتن ل بەرژەوەندیێن گەلێ کورد ل رۆژئاڤایێ کوردستانێ یە.
پێشابوور تاکە رێیا چوونووھاتنا خوشک و برایێن مە نە و رێیا دابینکرنا دەبارا خەلکێ رۆژئاڤایێ کوردستانێ یە، ژ بەر وێ په‌كه‌كه ب ڤان کاران و گرتنا خالا سنۆرییا پێشابوورێ، مەبەستا وێ ئەوە زیان بگه‌هیته خەلکێ سڤیلێ رۆژئاڤا، په‌كه‌كه ب خوە ژی بەرپرسە د راوەستاندنا چوونھاتنێ و گرتنا ڤێ خالا سینۆری.
