دژه ته‌رۆرا كوردستانێ گرووپا «ویلایه‌ت شیمال به‌غداد» یا داعشێ ده‌سته‌سه‌ر كر

دژه ته‌رۆرا كوردستانێ گرووپه‌كا «ویلایه‌ت شیمال به‌غداد» یا داعشێ ل هه‌ولێرێ ده‌سته‌سه‌ر كر

ئه‌نجومه‌نا ئاسایشا هه‌رێما كوردستانێ دانپێدانێن گرووپه‌كا سه‌ر ب رێخستنا ته‌رۆریستییا داعشێ ڤه‌ به‌لاڤ كر كو ل هه‌ولێرێ ده‌سته‌سه‌ر كرنه‌ و پیلان هه‌بوو كریارێن ته‌رۆریستی ئه‌نجام بدن.

ئه‌نجومه‌نا ئاساییشێ راگه‌هاندنه‌ك د ڤێ ده‌ربارێ دا به‌لاڤ كر و ئه‌ڤ ته‌كستا وێ یه‌:

رێڤه‌به‌رییا گشتی یا دژه‌ ته‌رۆرا كوردستانێ، گرووپێ «ویلایه‌ت شیمال به‌غداد» یێ سه‌ر ب رێخستنا ته‌رۆریستییا داعشێ ڤه‌ ل باژارێ هه‌ولێرێ ده‌سته‌سه‌ر كر.

ئه‌ڤ گرووپه‌ پێكهاتی بوو ژ گرووپه‌كێ ئه‌منی كو ل ده‌ما رابووری مه‌فره‌زه‌یه‌ك ل باژارێ هه‌ولێرێ دروست كربوو و هه‌روه‌ها كه‌سێن خوه‌كوژ بۆ ڤێ مه‌فره‌زێ ئاماده‌ دكرن، وان كاری بوو سێ خوه‌كوژان ئاماده‌ بكه‌ن.

یێك ژ كریارێن ته‌رۆریستی یێن ڤێ گرووپێ، ئه‌و بوو یێك ژ ڤان خوه‌كوژان ب ناڤێ «هیدایه‌ت» ل رێككه‌فتی 19ی تیرمه‌ها 2021ێ ل رۆژا عه‌ره‌فێ یا جه‌ژنا قوربانی، ل ناڤچه‌یا «مه‌دینه‌ت سه‌در» یا به‌غدا خوه‌ ته‌قاندبوو.

ئه‌ڤ گرووپه‌ رابوویه‌ ب كڕینا چه‌ك و پێداویستیێن سه‌ربازی و ره‌وانه‌ی به‌غدا كرینه‌، هه‌موه‌خت د پیلانێن وان دا هه‌بوو ل داهاتی كریارێن تیرۆریستی یێن زێده‌تر ئه‌نجام بده‌ن، لێ به‌لێ ب هه‌ول و شیانێن سازیێن ئه‌وله‌هیێن یێن هه‌رێما كوردستانێ، هاتنه‌ ئه‌شكه‌ره‌ كرن و ئه‌ندامێن ڤێ گرووپێ هاتنه‌ ده‌سته‌سه‌ر كرن.