گه‌نجه‌كێ عه‌فرینێ ژبه‌ر ئه‌شكه‌نجه‌یا چه‌تیێن تركیێ ژیانا خوه‌ ژ ده‌ست دا

efrin-al-rai

گه‌نجه‌كێ دن یێ عه‌فرینێ ژ بەر ئەشکەنجەیا هۆڤانە، نەخوەشی و مانا زێدەتر ژ سالان د زیندانێن چەکدارێن سەر ب ترکیێ ڤە، ژیانا خوە ژ دەست دا.

رێخستنا مافێن مرۆڤان ل عه‌فرینێ بەلاڤ کر، محەمەد عەدنان منلە عەلی یێ 32 سالی ژ باژارۆکێ راجۆیه‌، پشتی مانا زێدەتر ژ سالان د زیندانێن چەکداران دا، رۆژا 16/12/2021ێ ل نەخوەشخانەیەکا ترکیێ ژیانا خوە ژ دەست دا

وێ رێخستنێ دیار کر: «محەمەد عەدنان منلە عەلی، رۆژا 24/3/2018ێ دەما هێرشا ئارتێشا ترکیێ و گرووپێن چەکدار ل سەر عه‌فرینێ، ل گەل 30 کەسێن دن هاتبوو رەڤاندن و ژ بۆ زیندانا باژارۆکێ راعی یا سەر ب ئەعزازێ ڤە هاتن برن.

محەمەد و گرتیێن دن د زیندانا راعی دا راستی گەلەک لێدانێن هۆڤانە، ئەشکەنجەیا دەروونی و لاشی هلکرنا نەینووک و ددانان، دالقاندنا ب بلانجۆ، ئەلەکتریکێ و رێبازێن دن هاتن، ژ ئەنجاما ئەشکەنجەیێن هۆڤانە، ئەو تووشی گەلەک نەخوەشیان بوو، ژ وان ژی نەخوەشیا پەنجەشێرا چەرمی.

رێخستنا مافێن مرۆڤان دا زانی: «پشتی تێکچوونا تەندروستییا محەمەد ئەدنان منلە عەلی ب ئاوایەکی مەترسیدار، ژ زیندانا راعی بۆ زیندانا ماراتێ یا عه‌فرینێ هات ڤەگوهاستن و پشترە د مەها تەباخا بۆری دا سەربەست هاتە بەردان.

هه‌روه‌ها ده‌ست نیشان كر، ل وێ دەمێ ژی محەمەد ژ بۆ دەرمانکرنێ، ژ بۆ نەخوەشخانەیێن ترکیێ هات ڤەگوهاستن، پشتی کو چ پێشکەتن د رەوشا وی دا چێنەبوو، محەمەد رۆژا 16ێ ڤێ مەهێ ژ ترکیێ بۆ مالا خوە هات ڤەگەراندن و د هەمان رۆژ دا ژی ژیانا خوە ژ دەست دا.

زیندانا رائی ل هەرێما ئەعزازێ د دەستێ گرووپێن چەکدارێن سەر ب ترکیێ ڤە یە، ل گۆر زانیارییان دۆرا هەزار گرتیێن ژ عه‌فرینێ تێدا هه‌نه‌، ئه‌و گرتی راستی ئەشکەنجەیێن هۆڤانە تێن و د شەرت و مەرجێن خه‌راپ دا دمینن.