دەریێ سێمالکا هەیڤەکا دی گرتی بمینیت تشتەک ل بازاری نامینیت

دەریێ سێمالکا هەیڤەکا دی گرتی بمینیت تشتەک ل بازاری نامینیت

دەریێ سینۆری یێ پێشابوور-سێمالکا د ناڤبەرا رۆژئاڤا و باشوورێ کوردستانێ، ب تەمامی ھاتیە گرتن و ئەڤ یەک باندۆرەکا گەلەک خراب ل سەر ژیانا خەلکێ دکەت. بازرگانەک دبێژیت، “دبیت کو پشتی مەھەکێ تشتەک ل بازارێ نەمینیت.”

دەریێ وەلید یێ بازرگانیێ ژی کو 10 کیلۆمەتران دکەڤیتە باشوورێ دەریێ سێمالکا و رۆژانە ژ 100 ھەتا 200 بارھلگرێن کەلووپەلان تێدا دەرباس دبوون، گرتییە و ھێدی ھێدی کەلووپەل ژ بازارێ کێم دبن.

وەلاتی، ھەدا ئیبراھیم، دبێژیت، “شەکر نینە، ب جارەکێ نینە، مە ل بازاری نەدیتیە.”

ل گۆر ئامارێن لژنەیا شۆپاندنا بازرگانان، ل جەزیرا رۆژئاڤایێ کوردستانێ 250 بازرگان ھەنە کو کەلووپەلێن خوە ژ باشوورێ کوردستانێ تینن و نھا راوەستیانە. ئەو پێشبینی دکەن ھەیا مەھەکێ بازارێن دەڤەرێ بکارن خوارنێ ژ بۆ وەلاتیان دابین بکەن، لێ ژ وێ و پێڤە دێ مەخزەن ڤالا ببن.

ماجد عەبدێ، سەرۆکێ لژنەیا شۆپاندنا بازرگانان، دیار دکەت، “زیانەکا مەزن دگەهیتە خەلکی. ئەگەر دەری گرتی بیت نە تەنێ خوارن، خوارنا رۆژانە کو خەلک ل سەر دژین، دبیت کو پشتی مەھەکێ تشتەک ل بازارێ نەمینیت.”

ژ سەدی 70 خوارن و ڤەخوارن، مادەیێن ئاڤاکرنێ و ئاسن، پارچەیێن پیشەسازی و مەکانیک، کەلووپەلێن ناڤ مالێ و بەشەک ژ دەرمانان یێن ل رۆژئاڤایێ کوردستانێ، ژ باشوورێ کوردستانێ دەرباس دبن.

لێ 15ێ ڤێ مەھێ ژ بەر ئێریشا گرووپا جوانێن شۆرەشگەر بۆ سەر دەری، رێڤەبەریا پێشابوور بریارا گرتنا دەری دا.

د دەمەکێ دا کو رێڤەبەریا خوەسەر وێ ئێریشێ وەک “چالاکیەکا رەوا” دبینیت، ھەتا نھا چ ھەولێن دیپلۆماتیک ژ بۆ ئاساییکرنا پەیوەندیان نەھاتنە دایین.