ئیستخباراتا ھێزێن سووریا دەمۆکراتیک هه‌سه‌دێ گەفان ل مالباتێن پێشمەرگەیێن رۆژ ل باژارێ کۆبانی، ل رۆژئاڤایێ کوردستانێ ب دەرێخستنا وان ژ دەڤەرێ دكه‌ت، ئەگەر کوڕێن وان د ناڤ رەفێن ھێزێن پێشمەرگەیێن رۆژ دا بەردەوام بن.
باسنیۆزێ ل سەر زارێ چاڤکانیێن خوە ل رۆژئاڤایێ کوردستانێ بەلاڤ کر، ئیستخباراتا ھێزێن سووریەیا دەمۆکراتیک هه‌سه‌دێ بانگ ل مالباتێن پێشمەرگەیێن رۆژ ل باژارێ کۆبانی کرن و داخواز ژ وان کرن کو زەختێ ل سەر کورێن خوە بکه‌ن کو ژ رێزێن ھێزێن پێشمەرگەی دەرکەڤن و تەڤلی رەفێن هه‌سه‌دێ ببن.
هه‌روه‌ها دیاركر، ئیستخباراتا هه‌سه‌دێ کو د بن چاڤدێرییا کادرێن پارتییا کارکەرێن کوردستانێ په‌كه‌كێ دا یە، گەف ل مالباتان كرنه کو ئەگەر کورێن وان د ناڤ رەفێن پێشمەرگەیێن رۆژ دا بمینن و تەڤلی ناڤ هه‌سه‌دێ نەبن، دێ ژ ھەرێمێ هێنه ده‌رێخستن.
ئه‌ڤ یه‌ك ل ده‌مه‌كی دهێت كو ئەنجومەنا نشتمانییا کوردی ل سووریێ، ئه‌نه‌كه‌سێ، بەری نھا ب توندی گەفێن ھێزێن پارتییا یەکیتیا دەمۆکرات په‌یه‌دێ، باسکێ په‌كه‌كێ ل رۆژئاڤا کوردستانێ، ل سەر مالباتێن پێشمەرگەیێن رۆژ و نەچارکرنا مالباتێن وان شەرمەزار کربوو و ئەڤ یەک ب رەفتارەکا مینا رەفتارا رژێمێن دیکتاتۆر ل سووریێ حەساب کر.
ئەنجوومەنێ گۆت کو گرووپێن ئاساییشێ یێن سەر ب په‌یه‌دێ ڤە گەلەک جاران خەلکێ پێشمەرگەیێن رۆژ ل سەرانسەرێ ناڤچەیێن رۆژئاڤا کوردستانێ گازی کرنه و گەفا کوشتنێ ل وان کرن و ژ وان خواستن کو زەختێ ل زارۆکێن خوە بکه‌ن کو ژ رێزێن پێشمەرگەی دەرکەڤن.
ئاساییشا پیدێ ھەر وھا د ڤان دەمێن داوی دا ھن مالباتێن پێشمەرگەیان نەچار کرن کو ل دژی زارۆکێن خوە داخویانیێن ڤیدیۆیی بده‌ن، ئەڤ داخویانی د بن گەفا کادرێن لەشکەری دا ھاتنە وەرگرتن، ب ئارمانجا وەشاندنا ڤان ھەڤدیتنان د مەدیایا په‌كه‌كێ دا، ئه‌نه‌كه‌سێ ل ڤێ دەربارێ دا گۆتیە کو ئەڤ یەک رەفتارێن دیکتاتۆریێ و رژێمێن زالم ل دژی گەلێ مە دئینیته بیرا مە.
