پارێزگارێ دھۆکێ عەلی تەتەر دەربارێ گرتنا دەریێ سینۆری یێ د ناڤبەرا ھەرێما کوردستانێ و رۆژئاڤایێ کوردستانێ دا، داخویانیەک دا و دیار کر، پەکەکە بوویە سەدەما گرتنا دەریێ سێمالکا.
پارێزگارێ دھۆکێ عەلی تەتەر، ئیرۆ د کۆنفەرانسەکا رۆژنامەڤانی دا ئاشکەرا کر: «ل ھەموو جیھانێ نابیت کۆمەک کەس ل پێش چاڤێن ھێزێن ئەولەھیێ ئێریشێ ل سەر ئالیێ دی یێ دەریێ سینۆری بکن، مخابن، ھێزەکە پەکەکێ، ب ئالا و دروشمێن پەکەکێ ب دار و کەڤران، ئێریشی سەر خالا دەریێ سینۆری کر”.
پارێزگارێ دھۆکێ دەستنیشان کر: «راستە ئەم کوردین و برایێن ھەڤ دوینە، لێ ژ ئالیێ پێوەندی و یاسایا ناڤدەولەتی ڤە وەھا دهێتە دیتن کو بەشەک ژ خەلکێ سووریێ ئێریشی سەر دەریێ سینۆری یێ ھەرێما کوردستانا ئیراقێ کرییە، پۆلیسێن مە بریندار کرن و ئۆتۆمۆبیلێن مە شکاندن».
عەلی تەتەر ھەروەھا پرسی: «ل گۆر یاسا و پێوەندیێن ناڤدەولەتی، ل کیژان جھێ جیھانێ وەھا روو ددەت کو ھندەک کەس ژ ئالیێ ھێزێن ئەولەھیێ ڤە بێنە کۆمکرن، چادر ژ بۆ وان بهێنە دانان و ئێریشان ببەنە سەر ئالیێ دی یێ سینۆری؟».
پارێزگارێ دھۆکێ دەستنیشان کر: «سینۆر ھات گرتن، کی بوویە سەدەما گرتنا دەری ژی دیارە، لێ ئەگەر ھندەک پرسگرێکێن دیارکری ھەبن، دێ هێنە چارەسەر کرن، لێ دڤێت پەکەکە د سیاسەتا خوە دا بچیتە ڤە».
پارێزگارێ دھۆکێ د بەردوامییا داخویانیا خوە دا راگهاند: «پەکەکە د رۆژا ئالایێ کوردستانێ دا ژی ئێریشی سەر خەلکێ کر و رێ نەدا خەلک ئالایێ کوردستانێ بلند بکن و سەرێ خەلکێ شکاندن، ئەڤ ئالا، نەیێ پەدەکێ و ھەرێما کوردستانێ یە، لێ بەلێ یێ ھەموو کورد و کوردستانێ یە، ئەڤ ئالا د دەما ھاتیسە چێکرن دا، ھەموو رێخستنێن کوردان ل سەر رازی بوونە، ئەڤ ئالا د ھەموو بوونە و شۆرشان دا و ل کۆمارا کوردستانێ ل مەھابادێ ھاتییە بلند کرن، پەکەکە ب ڤێ سیاسەتێ ناچیتە سەری».
رۆژا 15ێ ڤێ مەھێ په‌كه‌كێ ب رێیا کۆمەکا جوانان كو پرانی ژێ عه‌ره‌بێن دێركێ و قامشلۆیێ بوون ژ ئالیێ رۆژئاڤایێ کوردستانێ ڤە ئێریشی سەر خالا سینۆری یا د ناڤبەرا رۆژئاڤا و ھەرێما کوردستانێ دا کر، بەرپرسێ خالا سینۆری یا پێشابوورێ شەوکەت بەربھاری ژی داخویانیەکێ دا راگھاندبوو، ژ سەد کەسان زێدەتر، ل بەر چاڤێ خەلکێ و ئاساییشا سێمالکا ئێریش کرن سەر خالا پێشابوورێ، د ئەنجامێ دا، ھەژمارەک ژ پاسەوانان ب گرانی بریندار بوون و جامێن ئۆتۆمۆبیلا ئاگرکوژێ ژی شکاندن.
