ئۆفیسا سەرۆکێ ھەڤپەیمانیا فەتح ھادی عامری راگھاند؛ عامری دیار کریە کو ئەو پابەندن ب بریارا دادگەھا بلندا فەدەرالی یا ئیراقێ کو ئیرۆ ئەنجامێن ھلبژارتنێن پارلەمەنتۆیێ پەسەند کرن.
د داخویانیا ھادی عامری دا ھاتیە دیارکرن؛ ژ بەر کو ئەو ب دەستوور و یاسایان پابەندن و ھەروھا باوەریا وان ھەیە کو ب پرۆسەیا سیاسی و رێرەوا دەمۆکراسیێ، گوھەرینا ئاشتیانەیا دەستھلاتێ ب رێیا سندۆقێن دەنگدانێ پێک دهێت، ئەو پابەندن ب بریارا دادگەھا فەدەرال.
ھەروھا ھاتیە گۆتن: “تەڤی کو باوەریەکا مەیا کوور و نێرینەکا مەیا یەک ئالیکەر ھەیە کو پرۆسەیا ھلبژارتنێ جھێ گومانەکا مەزنا سەختەکاری و دەستکاریکرنێ بوو و سکالایێن مەیێن کو مە پێشکێشی دادگەھا فەدەرال کرین، پێباوەر و مەنتقی و پەژراندی بوون لێ ئەم پابەندین ب بریارا دادگەها فەدرالی.”
د داخویانیێ دا ھاتیە دیارکرن کو ئەگەر ئەو سکالا ل ھەر وەلاتەکێ کو رێز ل دەمۆکراسیێ دگرن بھاتبا پێشکێشکرن، تێرا وێ یەکێ دکر کو ئەنجامێن ھلبژارتنان بهێنە بەتالکرن.
