پشكا شێری ژ هاریكاریێن ئه‌مه‌ریكا بۆ ئیراقێ، بۆ پێشمه‌رگه‌ی هات دیاركرن

us-peshmarga

سەرۆکێ ئه‌مه‌ریكا جۆ بایدن، بودجەیا وەزارەتا بەرەڤانیێ یا ئه‌مه‌ریكا (پەنتاگۆن) ب 777 ملیار دۆلاران پەسەند کر، ژ وێ بودجەیێ، 260 ملیۆن دۆلار ژ بۆ هاریكارییا هێزا پێشمەرگە هاتییە دیار کرن.

ل گۆر راپۆرتا بودجەیا سالا 2022ێ یا پەنتاگۆنێ، 345 ملیۆن دۆلار ژ بۆ هاریكاری و بچەککرنا هێزێن ئەولەهیێ یێن ئیراقێ هاتییە دیار کرن، د ناڤا وێ دا ژی،  260 ملیۆن دۆلار ژ بۆ پێشمەرگەیە.

هەروها د پرۆژە بودجەیا وەزارەتا به‌ره‌ڤانیێ یا ئه‌مه‌ریكا دا هاتییە، ژ بەر کو بەغدا مووچەیێن هێزا پێشمەرگە ناشینە، پارا مەزن یا هەڤکاریێن ئه‌مه‌ریكا بۆ ئیراقێ، ژ بۆی پێشمەرگە هاتییە دیار کرن.

دەربارێ رۆلا پێشمەرگە د ئیراقێ دا، راپۆرتا پەنتاگۆنێ ئاماژە ب وێ دایە کو رۆلا هێزێن پێشمەرگە یا گرینگ د رووبرووبوونا داعشێ دا هەیە و پێشمەرگە پێکهاتەیەکە سەرەکە یا هێزێن ئەولەهیێ یێن ئراقێ.

بودجەیا 2022ێ یا وەزارەتا بەرەڤانیێ یا ئه‌مه‌ریكا، 777 ملیار دۆلارە کو مەزنترین بودجەیا بەرەڤانیێ ل سەر ئاستا جیهانێ یە، ژ هەڤکارییا بۆ ئیراقێ ژی، پشکا شێر ژ بۆ پێشمەرگە هاتییە دیار کرن.