بارەگەها لەشکەری یا «ڤیكتۆریا» یا هێزێن ئه‌مەریکی ل نێزیکی فرۆکخانەیا ناڤدەولەتی یا بەغدایێ جارەکا دی راستی هێرشێ هات، ئەڤ ژی هێرشا سێیەمینە كو د دو رۆژێن بۆری دا ل سەر بارەگەهێن ئه‌مەریکی یێن ل ئیراقێ، دهێته کرن.
ژێدەرەکی ئەولەهیێ ژ بەغدایێ راگهاند، بەربانگا ئیرۆ 5/1/2022ێ ب 4 مووشەکێن کاتیوشا، هێرش ل سەر بارەگەها ڤیكتۆریا یا ئه‌مەریکی ل نێزیکی فرۆکخانەیا بەغدایێ هاتە کرن.
وی ژێدەری دیار کر ژی، 3 مووشەک ب رێیا سیستەما بەرەڤانییا ئاسمانی (c-ram) هاتن ئێخستن و مووشەکا 4ێ ژی ب نێزیکی بارەگەها ئه‌مەریکی کەت.
مەدیایا نێزیکی گرووپێن چەکدارێن ئیراقی دیار کرن، ئەو مووشەک ژ تاخا «جیهاد» یا نێزیکی فرۆکەخانەیا بەغدایێ ڤە هاتنە هاڤێتن و ئاڤاهییا پۆستا لەشکەری یا ئارتێشا ئه‌مەریکی ل بارەگەها “ڤیكتۆریا” کرنە ئارمانج.
ئەڤ هێرش د دەمەکێ دا یه، دوهی ژی بارەگەها لەشکەری «عەین ئەسەد» یا ل ئەنبارێ یا کو هێزێن ئامەریکا لێ نە، ب 2 درۆنان راستی هێرشێ هاتبوو.
د دو رۆژێن بۆری دا، ئەڤ هێرشا سێیەمینە کو ل سەر بارەگەهێن لەشکەری یێن ئه‌مەریکی ل ئیراقێ دهێنه کرن، ئەڤ هێرش هەڤدەمە ب سالڤەگەرا دویەمینا کوشتنا قاسم سولەیمانی و ئەبومەهدی موهەندس.
