بارەگەها ئارتێشا ترکیێ یا ل زێلکان جارەکا دی راستی ئێریشا مووشەکی هات

بارەگەها ئارتێشا ترکیێ یا ل سینۆرێ پارێزگەها نەینەوایێ، ئیرۆ راستی ئێریشەکا دی یا مووشەکی هات، ئەڤە ژی دبیتە جارا چارەمین ل دەما 2 هەفتەیان دا ئێریش ل سەر وێ بارەگەهێ دهێتە کرن.

ئیرۆ رۆژا شەمبی 15-1-2022ێ، بارەگەها ئارتێشا ترکیێ یا ل ناڤچەیا زێلکان گرێدایی پارێزگەها نەینەوایێ، راستی ئێریشەکا مووشەکی هات، دو مووشەکێن ژ جورێ کاتیۆشا ئاراستەی وێ بارەگەهێ هاتنە کرن.

ل گۆری مەدیایا ئیراقێ، چ زرارێن جانی ژ سەدەما ڤێ ئێریشێ نەهاتنە تۆمار کرن.

هێژای گۆتنێ یە، ئەڤ‌ دبیتە‌‌ جارا چارەمین ژ 27 کانوونا یەکێ یا سالا رابووری، بارەگەها ئارتێشا ترکیێ یا ل زێلکان دهێتە مووشەک باران کرن، ئێریشا یه‌كه‌مین ل 27 کانوونا یەکەم یا 2021ێ بوو و ئێریشا دوویه‌مین ژی ل 31 کانوونا یەکێ هاتبوو ئه‌نجام دان، ئێریشا سێیەمین ژی ل 3-1-2022ێ بوو.

پێگەهێن مەدیایێ یێن حەشدا شەعبی پاش ئێریشا 27 کانوونا یەکەم، ب ئاوایەکێ نەراستەراست بەرپرسیارییا ئێریشێ هلدان سەر حەشدێ و ژبۆی ئارتێشا ترک سلۆگانا «جهێ هەوە ل ڤر نینە» پارڤەكربوو.