ئارتێشا ئیراقێ، ئیرۆ هه‌ژماره‌كا چه‌كدارێن كۆما ب ناڤێ یه‌كینه‌یێن به‌رخوه‌دانا شه‌نگالێ یه‌به‌شێ، یا گرێدای رێخستنا په‌كه‌كێ ل شه‌نگالێ ده‌سته‌سه‌ر كرن و هه‌روه‌ها ده‌ست ب سه‌ر جه‌بلخانه‌یه‌كا وان ژی دا گرت.
چاڤكانیێن پێگه‌ها «داركا مازی» ل باشوورێ كوردستانێ ئه‌شكه‌ره كر، ئیرۆ رۆژا سێشه‌مبی 18/1/2022ێ، ئارتێشا ئیراقێ ب سه‌ر باره‌گه‌هێن یه‌به‌شێ دا ل شه‌نگالێ گرتن و 10 چه‌كدارێن وان ده‌سته‌سه‌ر كرن و هه‌روه‌ها ده‌ست ب سه‌ر جه‌بلخانه‌یه‌كا وان ژی دا گرت.
ل گۆری وێنه‌یێن كو ژ بۆ پێگه‌ها مه هاتنه شاندن، ئارتێشا ئیراقێ وێنه‌یێن دو ژ وان چه‌كدارێن یه‌به‌شێ به‌لاڤ كرنه كو هاتنه ژ چه‌ككرن.
چاڤكانیێن «داركا مازی» هه‌روه‌ها ده‌ست نیشان كر، پاش ده‌سته‌سه‌ر كرنا چه‌كدارێن وێ، یه‌به‌شێ ژی هه‌ژماره‌كا سه‌ربازێن ئارتێشا ئیراقێ ب دیل گرتنه و ڤێ یه‌كێ ره‌وش ل شه‌نگالێ و جهێن د بن كۆنترۆلا په‌كه‌كێ و یه‌به‌شێ دا ل شه‌نگالێ پتر ئالۆز كرییه.
ئارتێشا ئیراقێ به‌ری سێ رۆژان ب هێزه‌كا مه‌زن و چه‌كێن گران ڤه، گه‌هشتییه شه‌نگالێ، ژ بۆ كو چه‌كدارێن په‌كه‌كێ و یه‌به‌شێ و كۆمێن گرێدای رێخستنێ ژێ ده‌ربێخیت، په‌كه‌كێ ژی گه‌ف ل ئارتێشا ئیراقێ كرینه و ده‌لیڤه‌یا چێبوونا شه‌ڕ ل هه‌رێمێ هه‌یه.
