سەرۆکێ ئامەریکایێ جۆ بایدن، د جڤینا رۆژنامەڤانی یا کۆشکا سپی یا یەک سالیا خوە دا، ل سەر مژارا ئالۆزیا ناڤبەرا رووسیا و ئوکرانیایێ ژی راوەستیا و گۆت، “ئەز ب باوەرم کو رووسیا دێ چیتە ناڤا ئوکرانیایێ و ئەڤە دێ ژ بۆ وان فەلاکەتەک بیت.”
بایدن گۆت کو ھەر چەند پووتین شەرەکێ راستەقینە ناخوازیت ژی لێ دێ چیتە ناڤا ئوکرانیایێ و وەھا گۆت: “رووسیا دخوازیت وەلاتێن رۆژئاڤا، ئامەریکا و ناتۆیێ ب ئاوایەکی جدی تێست بکەت. ئەز ب باوەرم دێ چیتە ناڤا ئوکرانیایێ.”
سەرۆکێ ئامەریکایێ ھەروھا ل سەر ئیحتیمالا داگیرکرنا ئوکرانیایێ ھشیاری ژی دا رووسیایێ و دیار کر کو دێ بەدەلێ داگیرکرنا ئوکرانیایێ ژ بۆ رووسیایێ گران بیت و گۆت، ئەو ئامادە نە پشتگریێ بدەنە ھەڤپەیمانێن خوەیێن ناتۆیێ.
ھەروھا بایدن، ببیر خست کو ئەو دێ نھا ب بوهایێ 600 ملیۆن دۆلاران چەکان ژ بۆ ئوکرانیایێ بشینن و ھەگەر بچنە د ناڤا ئوکرانیایێ دێ وەنداھیێن جانی یێن رووسان گەلەک زێدە بن.