ئیراقێ ترسه‌كا هه‌ری مه‌زن ژ حه‌سه‌كێ هه‌یه‌

hasaka-iraq-isis

ب ئارمانجا رێگرتنا ل دەرباسبوونا چەکدارێن داعشێ ژ سووریێ بۆ ئیراقێ، ئیراق رێنمایێن ئەولەهیێ ل سەر سنۆری توندتر دکەت.

بەردەڤکێ فەرماندارێ گشتی یێ هێزێن چەکدارێن ئیراقێ، یەحیا رەسوول راگه‌هاند، رێنمایێن توند ل سەر سنۆر هاتن وه‌رگرتن ژ بۆ كو رێ ل بەر ڤەدزین و دەرباسبوونا چەکدارێن داعشێ بۆ ئیراقێ بهێته‌ گرتن.

گۆت ژی: «سەره‌دانا سەرۆکوەزیر مستەفا کازمی بۆ ده‌ڤه‌رێن سنۆری یێن دگه‌ل سووریێ، پەیامێن گرنگ تێدا نه‌ کو فەرماندارییا لەشکەری یا بلند گرنگیێ ددەته‌ خورتکرن و توندکرنا سنۆری».

دیار کر، ل سەر سنۆر خەنده‌كه‌كا ب فرەهی و کووراهییا 3 مەتران هاتیە کۆلان و تێلبه‌ند كرن، ساترێن ئاخێ، برجێن چاڤدێریێ، کامێرایێن تەرمال، چەکێن پێشکەتی هاتنه‌ دانان و هەروه‌ها گەرێن ئاسمانی ژی دهێنه‌ ئەنجام دان.

گۆت ژی: «هێزێن ئیراقی چاڤدێریا سنۆرێ دگه‌ل سووریێ دکه‌ن و ئەم ژ رەوشا کو ژ پشتی هێرشا تیرۆرستێن داعشێ ل سەر زیندانا باژارێ حه‌سه‌كێ روو دایە، نیگەرانن، ژ بەر وێ دڤێت ئەم سنۆرێ خوە بهێز بکه‌ین».

دەستنیشان کر ژی: «کۆنترۆلکرنا رەوشا زیندانا حه‌سه‌كێ و خوەرادەستکرنا ئەندامێن داعشێ، نایێ وێ واتەیێ کو مەترسی دەرباس بوویە، ئەم دێ ل سەر وێ بنگەهی كار كه‌ین کو مەترسی هێژان ژی مایە».

تەکەز کر ژی، «هێزێن ئیراقی سنۆران ب توندی دگرن و دێ ب توندی و ب بریار بەرسڤا هەر هەولەکە دەرباسبوون یان نێزیکبوونا ژ سنۆر ژ ئالیێ تیرۆرستان ڤە بده‌ن».

دیار کر ژی: «درێژاهییا سنۆرێ دگه‌ل سووریێ 605 كیلۆمه‌تره‌، هێزێن ئیراقی سنۆر ب تەمامی بهێز کرییە و ئەم ئامادەنە رووبروویی هەر حالەتەکا دەرباسبوونا چ ژ سووریێ بۆ ئیراقێ، یان ژ ئیراقێ بۆ سووریێ ببین».

پوستێن ھەمان بەش