ھێزێن سووریا دەمۆکراتیک (ھەسەدێ) راگھاند؛ د ئێریشا سەر زیندانا گوێران دا 40 شەرڤان، 77 کارمەند و ھێزێن پاراستنا زندانێ و 4 سڤیلان ژیانا خوە ژ دەست دانە. ھەروھا 374 چەکدارێن داعشێ د ڤی شەری دا ھاتنە کوشتن.
ھەسەدێ ب داخویانیەکێ ئامارێن ھەری داوی یێن ئێریشا ل زیندانا گوێران یا ل حەسەکێ ئاشکەرا کرن و گۆت: “چەتەیێن داعشێ د ھوندرێ گرتیگەھێ دا 77 ھەڤالێن مەیێن کارمەند و پاسەوانێن زیندانێ ب ئاوایەکێ ھۆڤانە شەھید کرنە. د شەرێ دەرڤەیێ زیندانێ کو 7 رۆژان بەردەوام بوو دا ژی 40 شەرڤان و 4 ھەموەلاتیێن مە شەھید کەتن. د چارچۆڤا پێنگاڤا گورزێ گەلان دا ب گشتی 121 کارمەند و شەرڤانێن مە ب قەھرەمانیەکا مەزن شەھید کەتن.”
ھێزێن سووریا دەمۆکراتیک (ھەسەدێ) د داخویانیا خوە دا بال کشاندیە سەر چاوانیا دەستپێکرنا ئێریشێ و دیار کریە: “د دیرۆکا 20/1/2022یێ دا، ل دەمژمێر 7ێ ئێڤاری ئێریشەکا بەرفرەھ و پلانکری یا تەرۆریستێن داعشێ ل سەر گرتیگەھا سیناعە یا ل حەسەکێ یا کو ب ھەزاران گرتیێن داعشێ لێ دمینن چێبوو. گەلەک گروپێن چەتەیێن داعشێ یێن خوەکووژ ژ دەرڤە ڤە تەڤلی ڤێ ئێرشێ بوون.”
هەرچەند ھەسەدێ پێش نها دزانی کو ئەڤ ئێریش دێ هێتە کرن لێ بەلێ راگهاند، دیارە کو ئەڤ ئێرشا داعشێ نە ئێرشەکا ژ رێزێ بوو. ئەڤ ئێرشە د ئەنجاما پلانەکا بەرفرەھ و دەمدرێژ دا پێش کەت و دبێژیت: “خواستن ڤێ بکەنە دەستپێکا ئێرشەکا مەزن ل سەر ھەرێمێ و جارەکا دی تەرۆرا کوشتنێ و دەمەکێ تاری و رەش ل سەر گەلێن ھەرێمێ فەرز بکەن و بدەنە ژیانکرن.”
ھەروھا ل سەر ھەژمارا کوشتیێن داعشێ ئاشکەرا کر کو 374 چەکدارێن داعشێ د ڤی شەری دا ھاتنە کوشتن.
