ئاماده‌كاریێن رووسیایێ ژ بۆ پێكئینانا هێرشەکا بەرفرەهـ ل سەر ئوکراینا به‌رده‌وامن و ئیسخبارتا ئه‌مه‌ریكایێ پێشبینی دكه‌ت، رووسیا هەموو ئاخا ئۆكراینا «داگیر بکەت».
چەند بەرپرسێن ئه‌مەریکی کو نەخوەستینە ناڤێن وان بهێن ئاشکەرا کرن، ل سەر زمانێ بەرپرسەکی ئیستخباراتا وی وەلاتی راگه‌هاندنە کو رووسیایێ ئامادەکاریێن خوە زێدەتر کرنە ژ بۆ پێكئینانا هێرشەکا بەرفرەهـ ل سەر ئوکراینا، هەروه‌ها دبێژن: رووسیایێ د پراكتیکێ دا نێزیکی 70% یا وێ هێزا پێدڤی بۆ ڤێ هێرشێ هه‌یه.
رووسیایێ زێدەیی 110 هەزار سەربازان ل سەر سنۆرێ رۆژهه‌لاتێ ئوکراینا کۆم کرینە و ب گۆتنا وان بەرپرسێن ئه‌مەریکی، شیانا وی وەلاتی هەیە کو ب وێ هێزا نها ل بەر دەستێ وێ یە، د دەما دو حەفتییان دا «هێرشەکا بەرفرەهـ» ل دژی ئوکراینا بکەت.
لێ ئیستخباراتا ئه‌مه‌ریكا هەتا نها نزانیت، ئه‌گه‌ر سەرۆکێ رووسیایێ ڤلادیمێر پوتین بریار دایە هێرش بهێته كرن یان نا؛ لێ دزانن کو پوتین دخوازیت هەموو بژرادە ل بەر دەستێ وی بن، ژ وان ژی پێكئینانا هێرشەکا سنۆردار، واتە کۆنترۆل کرنا هەرێما دۆنباس کو دکەڤیتە رۆژهه‌لاتێ ئوکراینایێ، یان هێرشەکا بەرفرەهـ ژ بۆ کۆنترۆلکرنا تەڤاهییا وەلات.
بەرپرسێن ئیستخباراتا ئه‌مه‌ریكا کۆنگرێسا وەلاتێ خوە ئاگاهدار دکه‌ن کو ئەگەر رووسیا ب ڤێ ئامادەکارییا بلەز یا کو نها دکەت، دێ هەتا نیڤا ڤێ مەهێ پێتری 150 هەزار سەربازان ل سنۆرێ ئۆكراینا کۆم كه‌ت، ئه‌ڤه هێزه ژی دێ تێرا داگیركرنا ئۆكراینایێ كه‌ت.
د ئاگاهدارکرنا بەرپرسێن ئیستخباراتا ئه‌مه‌ریكایێ دا بۆ کۆنگرێسی دهێته گۆتن: «ئەگەر پوتین بژاردەیا شه‌ری هه‌لبژێریت، دێ شێت د دەما 48 دەمژمێران دە باژارێ كیێڤا پایتەختا ئوکراینایێ کۆنترۆل بکەت و سەرۆکێ وەلات ڤۆلۆدیمیر زەلنێسکی ژ دەستهه‌لاتێ دوور بێخیت».
هەروها ل دەربارێ هەژمارا قوربانییان ژی هشیاری داینە کو ئەگەر شەر چێببیت، پێشبینی کرینە د ناڤبەرا 25 هەزار هەتا 50 هەزار کەسێن سڤیل بهێنه کوشتن و د ناڤبەرا 5 هەزار هەتا 25 هەزار سەربازێن ئوکراینایی ژی و 3 هەزار هەتا 10 هەزار سەربازێن رووسی بهێنه کوشتن و د ناڤبەرا ملیۆنەک هەتا 5 ملیۆنانكه‌سێن ئوکراینی دەربدەر ببن و بچن پۆلاندایێ.
د راپۆرتەکا تایبەتا سازییا ئیستخباراتا ئه‌مه‌ریكایێ دا تێ گۆتن کو د دو حەفتیێن بووری دا رووسیایێ زێدەیی 60 کەتیبەیێن سەربازی ل باکور، رۆژهلات و باشوورێ ئوکراینایێ ب تایبەتی ل نیڤگراڤا کریمیایێ ب جهـ کرینە،رۆژا ئینیێ 4ێ سباتا 2022ێ، زێدەیی 80 کەتیبەیێن سەربازی ژ ناڤەراستا رووسیایێ و 14 کەتیبەیێن دی ژ باژارێ ڤلادڤۆستۆکێ بەر ب ئوکراینایێ کەتینه رێ.
به‌ری حه‌فتییه‌كێ ژی نێزیکی هەزار و 500 سەرباز ژ یەکەیا سەربازی یا تایبەتا رووسیایێ ل سەر سنۆرێ رۆژهه‌لاتێ ئوکراینا هاتینه بجهـ کرن، هەروه‌ها هێزەکا زێدە یا دەریایی یا رووسیایێ ب 5 کەشتیێن سەربازی یێن تایبەت د ناڤ دەریایا رەش دا راوەستیاینە و ئامادەیی هێرشەکا ژ نێشکه‌كێ ڤەنە ل سەر بەراڤێن باشوورێ ئوکراینا.
