سەرۆکێ فره‌نسایێ راگه‌هاند، وی د هەڤدیتنا خوە دا د گه‌ل سەرۆکێ رووسیایێ پێشنیاز کر، «گارانتیێن ئەولەهیێ» ژ بۆ هەموو وەلاتێن په‌یوه‌ندی ب کریزا ئوکراینایێ ڤه هه‌یی بهێنه دانان.
ئەممانوئێل ماكرۆن و ڤلادیمێر پوتین پشتی جڤینا دوهی یا ل مۆسکۆیێ، د کۆنفەرانسەکێ رۆژنامەڤانی دا ناڤەرۆکا جڤینا خوە ئاشکەرە کرن.
ماكرۆن دا زانین، وی پێشنیاز کرییە، گارانتیێن ئەولەهیێ یێن بەربچاڤ ژ بۆ هەموو وەلاتێن کو د کریزا ئوکراینایێ دە جهـ دگرن، بهێنه دانان.
گۆت ژی: «سەرۆک پوتین ژ من را پشتراست کر، ئەو ئامادەیە ئارامی و یەکپارچەییا ئاخا ئوکراینایێ بپارێزیت».
پوتین ژی هەڤدیتنێن خوە ب هەڤتایێ خوە یێ فره‌نسی ل کرێملینێ، پۆزه‌تیڤ و جددی ب ناڤ کر و گۆت، هنده‌ك نێرینێن ماكرۆن دکارن ببن بنگەهێ گاڤێن هەڤپار.
پوتین دەستنیشان کر، گەلەک نێرینێن ماكرۆن یێن دەربارێ ئەولەهییا ئەورۆپایێ دا ریالیستن و گۆت ژی، پشتی ماكرۆن د گه‌ل سەرۆکاتییا ئوکراینایێ هەڤدیتنێ دكه‌ت، ئەو دێ ب تەلەفۆنێ ئاخڤن.
پوتین ئانی زمان کو رووسیا دێ هەموو هەولێن خوە ده‌ت ژ بۆ کو د گه‌ل رۆژئاڤا ل سەر دۆسیایا ئوکراینا “بگه‌هنه رێکەفتنان”.
