زێدەیی 50 ئەندامێن کۆنگرێسا ئه‌مه‌ریكایێ داخوازێ ژ وەزارەتا دەرڤە و بەرەڤانیێ یا وەلاتێ خوە دکن کو داخوازا ترکیێ یا کرینا بالافرێن F-16 یێن ئه‌مه‌ریكی رەد بکن.
د نامەیەکێ دا کو ئیمزایا زێدەیی 50 ئەندامێن کۆنگرێسا ئه‌مه‌ریكایێ ژ هەردو پارتیێن کۆماری و دەمۆکرات ل سەرە، داخواز ژ وەزارەتێن دەرڤە و بەرەڤانیێ یێن ئه‌مه‌ریكایێ هاتییە کرن کو دەستپێشخەرییا ترکیێ یا کرینا بالافرێن شەر یێن F-16، رەد بکن.
د نامەیا ئەندامێن کۆنگرەسا ئه‌مه‌ریكایێ دە کو راستەراست ژ وەزیرێ بەرەڤانیێ لۆید ئۆستن و وەزیرێ دەرڤە ئانتۆنی بلنکەن هاتییە شاندن، تێ گۆتن: «ئەم ب دژواری داخوازێ ژ وە دکن، دەستپێشخەرییا داوی یا ترکیێ ژ بۆ کرینا بالافرێن F-16 و کەرەستەیێن پێویست ژ ئه‌مه‌ریكایێ بۆ مۆدەرنیزەکرنا هێزا خوە یا ئەسمانی، رەد بکن».
د نامەیێ دا تێ گۆتن: «پەسەندکرنا دەستپێشخەریا ترکیێ، خەلاتکرنا رەجەپ تاییپ ئەردۆگانە ل سەر پاشگوهخستنا پێبەندیێن خوە ل بەرامبەر هەردو هه‌ڤپه‌یمانێن وی کو ئه‌مه‌ریكا و ناتۆنە، ئەڤه ژبلی بنپێکرنا بەرفرەهـ یا مافێن مرۆڤان کو رەژیما وی ل ناڤ و دەرڤەی تركیێ دکەت».
د نامەیا خوە دە ئەشکەرە کرنە کو «د مژدارا سالا 2021ێ دا، ترکیێ داخواز ژ ئه‌مەریکایێ کرییە کو بالافرێن F-16 پێ بهێنه فرۆتن ژ بۆ كو هێزا خوە یا ئەسمانی پێشبێخیت.
كۆنگرێسمه‌نان گۆتییه: «رەژیما ئەردۆگان» ب درێژاهییا چەندین سالان، چەندین جاران هێزا خوە یا سەربازی بۆ «نەئارامکرنا» رۆژهلاتێ دەریایا سپی، رۆژهلاتا ناڤین، باشوورێ قەفقاسێ و باکورێ ئەفریقایێ بکار ئانییە».
هەروها دبێژن: «هێزێن ترکیێ و گرووپێن ترکیە پشتگرییا وان دکەت، کەرەستەیێن ئه‌مەریکی بۆ ئه‌نجامدانا «تاوانێن شەر»، د ناڤ دا ب «قەست» بۆردوومانکرنا ئارمانجێن سڤیل وەک نەخوەشخانە و خواندنگه‌هان ل ئیراقێ، سووریێ و كاراباخێ ب كار دئینیت».
