سەرۆکێ پارتییا گه‌ل یا كۆمار جه‌هه‌پێ ل هەمبەری بلندکرنا بهایێ ئەلکتریکێ نەرازیبوون نیشان دا و گۆت، «هەتا کو ئەردۆگان بهایێ کو ل 31ێ کانوونێ ئیمزا كری پاشڤە نه‌كێشیت، ئەز ژ ئیرۆ پێ ڤە فاكتوورا ئەلکتریکێ ناده‌م».
كه‌مال کلچدارئۆغلو سەرۆکێ گشتی یێ جه‌هه‌پێ ل سەر حه‌سابا خوە یا تویته‌رێ ڤیدیۆیه‌ك بەلاڤ کر و تێدا بەحسا بلندبوونا بوهایێ ئەلکتریکێ ژی کر.
کلچدارئۆغلو دەربارێ فاكتوورێن ئەلکتریکێ یێن ڤان دەمێن داویێ كو زێدە بووینە وه‌ها گۆت: «چما فاكتوورێن وە یێن ئەلکتریکێ زێدە بوون؟ کێ چاڤ بەردایه پاریێ نانێ هشکێ وە؟ تەنێ ب هەڤ رە ئەم دکارن داویێ ب ڤێ زلمێ بینین. فەرمۆ ل ڤێرێ، ل سەر ڤێ تابلۆیێ دا ئه‌م بئاخڤین».
کلچدارئۆغلو گۆت: “ئەگەر هوون ل فرۆتنا سازییا ئەلکتریکێ بۆ شەخسان بنێرن، هوون دێ ناڤێن پر ناس ببینن. هوون دێ ل وێرێ کۆما چەتەیێن ژ پێنج کەسان پێک دهێت ببینن. وان چەتەیان چ کر؟ هەر تشت شەلالندن. چیرۆکا ڤێ شەلاندنێ دوور و درێژە. لێ ئەگەر ئەو بخوازن، ئەم دکارن بەحسێ وێ ژی بکه‌ین».
سەرۆکێ جه‌هه‌پێ بانگ ل سەرۆکۆمارێ ترکیێ رەجەپ تاییپ ئەردۆگان کر و گۆت: «بوهایێ ئەلیکتریکێ یا کو تە د شەڤا 31ێ کانوونێ دا ئیمزا کرییه، ژێ لێڤه ببه. بلا فاكتوور ببن وەکە بەریا 31ێ کانوونێ. تە چاوا بهایێ وێ زێدە کر، دڤێت ب هەمان ئاوایی کێم ژی بکه‌ی».
هه‌روه‌ها گۆت: «هەتا کو ئەردۆگان بوهایێ کو د 31ێ کانوونێ دا ئیمزا كری ڤەنەکێشیت، ئەز ژ ئیرۆ و پێ ڤە فاكتوورێن خوە یێن ئەلکتریکێ ناده‌م».
